Hoeness mbështet Kane për Topin e Artë dhe kritikon Messin e Mbappen

Uli Hoeness, presidenti i nderit i Bayern Munichut, e konsideron Harry Kane kandidatin më të denjë për ta fituar Topin e Artë në vitin 2026, pas paraqitjeve të jashtëzakonshme të sulmuesit anglez me skuadrën bavareze.

Sipas Hoeness, Kane ka shkëlqyer në të gjitha kompeticionet gjatë këtij sezoni dhe e meriton plotësisht çmimin prestigjioz.

“Ai absolutisht e meriton dhe shpresoj që ta fitojë. Harry Kane ka zhvilluar një sezon të jashtëzakonshëm në çdo garë. Nëse nuk e fiton këtë vit, atëherë kur do ta meritojë?”, u shpreh Hoeness.

Përveç mbështetjes së hapur ndaj Kane, 74-vjeçari analizoi edhe disa prej rivalëve kryesorë në garën për Topin e Artë, duke u ndalur veçanërisht te Lionel Messi dhe Kylian Mbappe.

Në lidhje me yllin argjentinas, Hoeness deklaroi: “Mendoj se do të ishte marrëzi që Messit t’i jepej Topi i Artë për herë të pestë”, ndonëse në të vërtetë Messi do të garonte për ta fituar këtë trofe për herë të nëntë.

Kur foli për Kylian Mbappen, presidenti i nderit i Bayernit përmendi faktin se Real Madridi e mbylli sezonin e kaluar pa fituar asnjë trofe.

“Ata, Real Madridi, nuk fituan asnjë trofe, kurse ne fituam dy”, theksoi Hoeness.

Ai komentoi gjithashtu të ardhmen e Harry Kane në Bayern Munich, duke sqaruar se personalisht nuk merr pjesë në mënyrë të drejtpërdrejtë në negociatat për kontratën e sulmuesit anglez.

Bisedimet po drejtohen nga Jan-Christian Dreesen, drejtori ekzekutiv i klubit bavarez.

“Nuk është e nevojshme t’i përsëris vazhdimisht mendimin tim, sepse ai tashmë e di se çfarë mendoj. Palët po bisedojnë dhe do të shohim se si do të përfundojë gjithçka”, përfundoi Hoeness.