Harry Kane pranë rinovimit me Bayern Munichun, marrëveshja pritet ta mbajë deri në vitin 2029

Harry Kane duket se do të vazhdojë aventurën te Bayern Munich edhe pas përfundimit të këtij sezoni, pasi klubi gjerman ka avancuar ndjeshëm në bisedimet për zgjatjen e kontratës së sulmuesit anglez.

Sipas Sky, palët kanë gjetur gjuhën e përbashkët për elementet kryesore të marrëveshjes së re, ndërsa kanë mbetur për t’u zgjidhur vetëm disa çështje të fundit.

Kontrata e re pritet ta lidhë kapitenin e Anglisë me “Allianz Arena” deri në vitin 2029.

Sigurimi i së ardhmes së Kane është një objektiv i rëndësishëm për Bayern Munichun dhe si klubi, ashtu edhe lojtari besojnë se rinovimi mund të finalizohet së shpejti.

Pika që vazhdon të mbetet e hapur ka të bëjë me përfshirjen e mundshme të një klauzole lirimi.

Sulmuesi thuhet se dëshiron një dispozitë që t’i japë mundësinë të rikthehet në Ligën Premier në një moment të ardhshëm.

Në lidhje me këtë kërkesë, është shqyrtuar edhe opsioni që Tottenham Hotspur, skuadra ku Kane luajti më parë, të mund të barazojë një ofertë nëse ai zgjedh të rikthehet në Angli.

Nuk është konfirmuar ende nëse kjo klauzolë do të jetë pjesë e kontratës përfundimtare.

Po ashtu, palët nuk kanë caktuar ende një datë të saktë për firmosjen e marrëveshjes së re.

Pavarësisht kësaj, negociatat po zhvillohen pozitivisht dhe sinjalet janë të qarta se Kane pritet të mbetet lideri i repartit ofensiv të Bayern Munichut edhe gjatë viteve të ardhshme.