Hansi Flick: “Nuk më pëlqen të bëj krahasime” mes Barcelonës dhe Bayernit historik

Pas triumfit bindës 5-1 ndaj Feyenoordit në Ligën e Kampionëve, trajneri i Barcelonës, Hansi Flick, nuk pranoi të vendoste në peshore skuadrën e tij aktuale me atë formacion të Bayern Munichut që arriti të fitojë gjashtë trofe në një vit të vetëm.

Katalanasit realizuan një paraqitje të fuqishme në ndeshjen e fazës së parë të garës evropiane, duke mposhtur thellë Feyenoordin dhe duke marrë vlerësime të shumta për lojën e treguar.

Megjithatë, tekniku gjerman shmangi çdo lloj paraleleje mes grupit që drejton tani dhe atij Bayerni gjashtëtrofe që ai udhëhoqi në të kaluarën.

“Nuk më pëlqen t’i bëj këto lloj krahasimesh. Megjithatë, ndihem shumë mirë në Barcelonë. Gjërat duken premtuese, por jemi ende në fillim të rrugës”, deklaroi fillimisht Flick.

Ai shtoi se i gjithë grupi ka një uri të madhe për progres. “Secili lojtar është i etur për t’u rritur dhe kjo reflektohet si në ekip ashtu edhe në paraqitjet e tyre në fushë”.

Më tej, trajneri theksoi angazhimin e lartë të futbollistëve të tij. “Skuadra po punon shumë mirë dhe me intensitet të lartë. Tregojmë shumë cilësi kur kemi topin në zotërim. Jam tejet i kënaqur me atë që po shoh”, u shpreh ai.

Në fund, Flick theksoi se fokusi mbetet te përmirësimi i vazhdueshëm. “Ne ende mund të rritemi dhe ky duhet të jetë objektivi ynë: të mbajmë një intensitet të lartë në stërvitje, të ruajmë një avantazh konkurrues, të shohim se ku mund të bëhemi më të mirë dhe të qëndrojmë të përqendruar në këtë. Ne synojmë gjithmonë më të mirën”, përfundoi trajneri i Barcelonës.