Hansi Flick kërkon që Barcelona të ndjekë sulmuesin që po shkëlqen në La Liga

Hansi Flick i ka kërkuar Barcelonës të monitorojë Roberto Fernandezin, sulmuesin 24-vjeçar të Espanyolit, raporton gazetari Ekrem Konur.

Roberto e ka nisur në mënyrë të shkëlqyer sezonin me Espanyolin, duke realizuar gjashtë gola në gjashtë xhirot e La Ligës. Ai ka qenë titullar në të gjitha këto ndeshje dhe ka regjistruar gjithsej 523 minuta në kampionat.

Paraqitja e tij e fundit me gol ishte më 15 shtator, në humbjen 2-1 të Espanyolit përballë Rayo Vallecanos. Më herët, sulmuesi kishte shënuar nga dy herë kundër Osasunës dhe Levantes, si dhe kishte gjetur rrjetën ndaj Real Sociedadit.

Kontrata e 24-vjeçarit me Espanyolin është e vlefshme deri në qershor të vitit 2031, ndërsa marrëveshja përmban një klauzolë lirimi prej 25 milionë eurosh. Përveç Barcelonës, situata e tij po vëzhgohet edhe nga Como, Fiorentina dhe Hull City.

Sipas informacionit të Ekrem Konur, Roberto është përfshirë në listën e sulmuesve që klubi katalanas po ndjek për afatet e ardhshme kalimtare. Barcelona po e vëzhgon nga afër zhvillimin e tij me kërkesë të Flickut, por deri tani nuk ka paraqitur asnjë ofertë zyrtare.

Fernandez ka qenë edhe më parë pjesë e klubit katalanas. Gjatë sezonit 2022/23, ai luajti në formë huazimi për Barcelona Atletic, por skuadra e dytë e Barcelonës vendosi të mos e përdorte opsionin e blerjes të përfshirë në marrëveshje.

Në verën e vitit 2025, Espanyoli bleu nga Sporting Braga 50 për qind të të drejtave të Robertos për rreth 6 milionë euro dhe ia zgjati kontratën deri në vitin 2031. Pas plotësimit të kushteve të parashikuara në marrëveshje, klubi siguroi më vonë 62.5 për qind të të drejtave ekonomike të lojtarit.

Klubet që kanë kërkuar informacion për sulmuesin gjatë afatit kalimtar janë në dijeni të klauzolës së tij prej 25 milionë eurosh. AS e ka renditur Hull Cityn mes skuadrave më të interesuara, ndërkohë që edhe Fiorentina dhe Como vazhdojnë ta monitorojnë.