Granit Xhaka flet për herë të parë mes zërave për një kalim të mundshëm te Chelsea

Granit Xhaka ka theksuar se vëmendja e tij e vetme mbetet te Kupa e Botës, edhe pse interesimi i Chelseat për ta afruar vazhdon të përmendet.

Mesfushori i Sunderlandit e udhëhoqi Zvicrën me shiritin e kapitenit në një sukses bindës 2-0 kundër Algjerisë në fazën e 1/16 së finales të premten, vetëm disa ditë pasi emri i tij u lidh me klubin londinez.

Sipas talkSPORT, Chelsea ka bërë një ofertë të parë prej afërsisht 9.3 milionë eurosh për Xhakën.

Megjithatë, Sunderlandi e ka hedhur poshtë menjëherë këtë propozim, duke e vlerësuar atë si “plotësisht të papranueshme”.

Po sipas raportimeve, “Macet e Zeza” nuk planifikojnë të marrin në shqyrtim oferta të tjera për mesfushorin dhe nuk ndiejnë asnjë detyrim për ta nxjerrë në shitje.

Në të njëjtën kohë, trajneri i ri i Chelseat, Xabi Alonso, raportohet se kërkon një ribashkim me Xhakën, me të cilin bashkëpunoi për dy sezone te Bayer Leverkusen. Të dy ishin pjesë e ekipit që në vitin 2024 fitoi titullin e Bundesligës pa pësuar humbje.

Edhe pse e ardhmja e tij është bërë objekt spekulimesh të shumta, Xhaka ka bërë të ditur se gjatë angazhimit me kombëtaren nuk dëshiron të përfshihet në diskutime për transferimin.

“Nuk është puna ime të flas për një transferim të mundshëm te Chelsea. Për këtë kam menaxherët e mi. Unë dua të përqendrohem plotësisht te Kupa e Botës”, deklaroi Xhaka.

Këtë fokus ai e dëshmoi edhe në ndeshje, pasi luajti të gjitha 90 minutat në fitoren 2-0 të Zvicrës ndaj Algjerisë, rezultat që i dha kombëtares së tij kualifikimin në fazën tjetër të Kupës së Botës.