Gostivari pret “Global Fight Night” më 23 korrik, Benjamin Imeri në mbrojtje të titullit

Gostivari do të shndërrohet në epiqendrën e boksit profesionist më 23 korrik 2026, kur në Sallën e Sportit “Rinia”, duke nisur nga ora 18:00, do të zhvillohet eventi ndërkombëtar Global Fight Night.

Në ring do të zbresin disa prej emrave më të njohur të boksit profesionist, duke premtuar një mbrëmje të mbushur me duele të nivelit të lartë.

Përballja kryesore e mbrëmjes do të jetë ajo mes kampionit aktual Benjamin Imeri dhe Edwin Mosquera, një duel që pritet të tërheqë vëmendjen e madhe të tifozëve të boksit.

Në këtë event do të paraqitet edhe Denis Nurja, i cili vetëm dy muaj më parë boksoi në Australi kundër Tim Tszyu, në një mbrëmje të ndjekur nga mbi 15 mijë spektatorë.

Gjithashtu, pjesë e spektaklit do të jetë edhe Mikel Cullhaj, një nga emrat më të spikatur në kategorinë Cruiserweight, që vazhdon të mbetet i pamposhtur në karrierën e tij profesionale.

Në Global Fight Night do të marrin pjesë edhe boksierë të njohur ndërkombëtarë si Rico Giger nga Zvicra, Anthony El Moeti, Taylan Coskun dhe Blendon Sadiki, duke i dhënë aktivitetit një dimension të rëndësishëm ndërkombëtar.

Organizatorët presin pjesëmarrje të madhe të sportdashësve dhe premtojnë një mbrëmje spektakolare, ku publiku do të ketë mundësi të ndjekë nga afër ndeshje të boksit profesionist të nivelit më të lartë.

Global Fight Night do të zhvillohet më 23 korrik, duke filluar nga ora 18:00, në Sallën e Sportit “Rinia” në Gostivar, ndërsa pritet të jetë një nga ngjarjet sportive më të rëndësishme të vitit në rajon.