Goli nga penalltia i jep Spanjës avantazhin ndaj Francës në pjesën e parë

Pjesa e parë e gjysmëfinales së Kupës së Botës 2026 u mbyll me Spanjën në avantazh minimal 1-0 kundër Francës, pasi Mikel Oyarzabal shënoi me saktësi nga pika e bardhë.

Furitë e kuqe e nisën takimin nën presionin e francezëve, të cilët u shfaqën disa herë rrezikshëm në zonën kundërshtare me Bradley Barcolan dhe Michael Olisen si protagonistë, por pa gjetur dot portën e mbrojtur nga Unai Simon.

Çasti vendimtar erdhi në minutën e 20-të, kur Lucas Digne ndërhyri në mënyrë të gabuar brenda zonës, duke detyruar gjyqtarin Ivan Barton të akordojë penallti. Dy minuta më vonë, Oyarzabal e shndërroi në gol goditjen nga 11 metrat, duke mposhtur portierin Mike Maignan dhe duke dërguar shifrat në 1-0.

Pas avantazhit, Spanja mori frenat e ndeshjes dhe kërkoi me ngulm golin e dytë. Fabian Ruiz pati një rast të mirë, por goditja e tij u ndal në çastin e fundit nga mbrojtja franceze, ndërsa Pedro Porro dhe Dani Olmo provuan fatin nga distanca, pa arritur të gjejnë shenjën.

Në krahun tjetër, Franca hasi vështirësi për të krijuar mundësi konkrete. Kylian Mbappe u ndëshkua disa herë për pozicion jashtë loje, kurse rasti më i pastër i takimit erdhi nga Barcola, i cili gjuajti mbi traversë nga një pozicion anësor në zonë.

Një tjetër sfidë për skuadrën e Didier Deschamps ishte dëmtimi i William Salibas, i cili u largua me forcë nga fusha në minutën e 30-të, duke i lënë vendin Maxence Lacroix.

Me këtë avantazh të ngushtë pas 45 minutash lojë, Spanja tani gjendet vetëm një gjysmë pjesë larg sigurimit të biletës për në finalen e madhe të Botërorit 2026.