Goditje nga FIFA për Dinamon, merkatoja bllokohet; në rast kualifikimi në “play-off” ekipi i Dajës rrezikon pa përforcime

Përtej humbjes minimale 1-0 pësuar në transfertën letoneze përballë Audas, Dinamo tani ndodhet përballë një tjetër pengese të madhe që mund t’i kushtojë shtrenjtë në vijim të aventurës europiane.

Federata Ndërkombëtare e Futbollit ka vendosur të ngrijë aktivitetin e merkatos për klubin kryeqytetas, për shkak të disa detyrimeve financiare të mbetura pa u shlyer. Ky ndëshkim vjen në një moment delikat, teksa skuadra po lufton për mbijetesë në kualifikueset e Conference League.

Kështu, edhe nëse ekipi i drejtuar nga Ilir Daja arrin të përmbysë rezultatin më 13 gusht në “Elbasan Arena” dhe siguron kalimin në fazën “play-off”, do t’i duhet patjetër të mbyllë pagesat e vonuara për të pasur të drejtën e federimit të lojtarëve të rinj. Në të kundërt, merkato mbetet e bllokuar dhe planet për përforcime mbesin pezull.