“Gjithçka mund të ndodhë”, ylli i Real Madridit lë të hapur mundësinë e largimit

Transferimi i Kylian Mbappes tek Real Madridi nga kjo verë e tutje do të ketë padyshim një efekt në minutat që do të kenë disa prej yjeve të Carlo Ancelottit.

Ndoshta lojtari më i prekur nga transferimi i yllit francez mund të jetë Rodrygo, veçanërisht nëse Ancelotti vendos që ta përdorë sistemin 4-4-2 me të cilin shkëlqeu këtë sezon,

Rodrygo me shumë gjasë do të ‘sakrifikohet’ nga tekniku italian për t’i liruar vendin në formacion Mbappes, ani pse ata mund të luajnë së bashku në rast se Ancelotti vendos ta rikthejë sistemin 4-3-3.

Sidoqoftë, pikëpyetje janë ngritur në lidhje me të ardhmen e brazilianit për shkak të transferimit të Mbappes, dhe ai tashmë ka hedhur benzinë në këto thashetheme.

Në një intervistë për DAZN, Rodrygo ka pranuar se ai nuk është i sigurt nëse ai do të qëndrojë tek Real Madridi për aq kohë sa ai do të dëshironte.

“Gjithçka mund të ndodhë. Unë kam kontratë këtu, por nuk e di. Unë gjithmonë kam thënë se dua të jem pjesë e klubit, por le të shohim”, ka thënë Rodrygo.

Ndikimi që ka pasur Rodrygo këtë sezon nuk ka qenë aq i madh në krahasim me lojtarët e tjerë të Real Madridit, por ai padyshim mbetet një lojtar i rëndësishëm për ‘Los Blancos’. /Telegrafi/