Giggs rrëfen si Manchester Unitedi nuk e besoi Mbappen dhe humbi mundësinë për ta transferuar

Manchester Unitedi pati mundësinë ta afronte Kylian Mbappen shumë kohë përpara se sulmuesi francez të shndërrohej në një nga emrat më të mëdhenj të futbollit botëror.

Ryan Giggs, legjenda e “Djajve të Kuq”, ka treguar se klubi anglez mori sinjalet e para për talentin e tij në vitin 2015, kur Mbappe ishte ende në hapat e parë të karrierës te Monaco.

Gjatë një bisede me Rio Ferdinandin në emisionin “Rio Ferdinand Presents: The Brief”, Giggs rrëfeu se informacioni i parë për francezin i erdhi nga një tifoz i Manchester Unitedit, të cilin e takoi në Francë.

Giggs tregoi se ndodhej në jug të Francës dhe po kthehej në hotel pas një shëtitjeje në një fshat të zonës. Në atë moment, ai kuptoi se dikush po e ndiqte dhe, sapo mbërriti në hotel, një person iu afrua.

Burri u prezantua si Lionel dhe i tha Giggsit se ishte tifoz i madh i Manchester Unitedit dhe i tij. Më pas, ai i shpjegoi se ndiqte nga afër futbollin e të rinjve në Francë dhe i sugjeroi të interesohej për një lojtar të Monacos me emrin Kylian Mbappe, të cilin e konsideronte të përshtatshëm për Unitedin.

Disa javë pas takimit, Lionel i përcolli Giggsit me email të gjitha të dhënat për talentin francez. Ish-anësori i Unitedit ia kaloi informacionin stafit të klubit, së bashku me Albertin, një tjetër ndihmës i skuadrës në atë periudhë.

Të dy ndoqën disa ndeshje të të rinjve të Monacos dhe e panë Mbappen në fushë. Paraqitja e tij u la përshtypjen se bëhej fjalë për një lojtar të veçantë dhe jashtëzakonisht premtues.

Pas kësaj, Manchester Unitedi përfshiu edhe departamentin e skautëve në vlerësimin e tij. Një përfaqësues i klubit në Francë u dërgua ta shihte Mbappen në një ndeshje ku Monaco përballej me PSG-në.

Skauti udhëtoi drejt Parisit për takimin, ndërsa disa javë më vonë Giggs e pyeti për përshtypjet e tij. Përgjigjja ishte se klubi nuk ishte bindur sa duhej për lojtarin dhe kishte vendosur ta linte çështjen me aq.

Mbappe qëndroi te Monaco dhe më pas shpërtheu në skenën e futbollit evropian. Në vitin 2017, ai u transferua te Paris Saint-Germaini.

Sot, francezi luan për Real Madridin dhe shihet si një prej favoritëve kryesorë për të fituar Topin e Artë të vitit 2026.