Futbollisti u deklarua i vdekur, por disa orë më vonë lëvizi dorën në morg

Një episod i jashtëzakonshëm ka tronditur futbollin në Nigeri. Mbrojtësi Chinedu Ozor u deklarua i vdekur pasi pësoi kolaps në një ndeshje miqësore, ndërsa disa orë më pas u zbulua se po jepte shenja jete në morg.

Ozor, i transferuar së fundmi te Katsina United, u rrëzua në fushë gjatë minutave të para të takimit përgatitor kundër Niger Tornadoes. Pasi mori ndihmën e parë nga stafi mjekësor, ai u transportua me urgjencë drejt një spitali pranë stadiumit.

Mjekët e ekzaminuan dhe e shpallën të vdekur, ndaj trupi u dërgua në morg. Megjithatë, sipas raportimeve të publikuara të mërkurën, më 12 gusht, disa orë më vonë Ozor lëvizi dorën. Të pranishmit dyshuan menjëherë se futbollisti mund të ishte ende gjallë dhe ndërhynë pa humbur kohë.

Mbrojtësi u transferua me urgjencë në Katsina General Hospital. Aktualisht ai mbahet në repartin e terapisë intensive, ku po furnizohet me oksigjen dhe mjekët po punojnë për stabilizimin e gjendjes së tij.

Zhvillimi i pazakontë u konfirmua edhe nga Heartland, ish-klubi i futbollistit. Në deklaratën e tij, klubi bëri të ditur se, sipas burimeve të besueshme, Chinedu Ozor ishte larguar nga morgu dhe ishte dërguar në spital pasi kishte shfaqur lëvizje.

Vetëm pak orë përpara këtij zhvillimi, Katsina United kishte publikuar lajmin se lojtari kishte humbur jetën.

Në njoftimin fillestar, klubi shprehej i pikëlluar për humbjen tragjike të lojtarit të ri, Chinedu Ozor, pas emergjencës mjekësore të ndodhur gjatë miqësores së asaj dite me Niger Tornadoes. Katsina United përcillte gjithashtu mendimet, lutjet dhe mbështetjen për familjen dhe njerëzit e tij të dashur, duke e mbyllur mesazhin me fjalët: “Pusho në paqe, luftëtar”.

Më pas, drejtori i komunikimit i Katsina United, Nasir Gide, dha sqarime për mënyrën se si ishte konfirmuar fillimisht vdekja e futbollistit.

Gide deklaroi se, pasi Ozor ishte dërguar me urgjencë në një spital aty pranë, një mjek e kishte shpallur të vdekur.

Ai shtoi se klubi kishte marrë një raport nga policia dhe më pas e kishte transportuar lojtarin në Katsina General Hospital, ku ai ishte deklaruar sërish i vdekur.

Njoftimi i parë për vdekjen e Ozor kishte sjellë reagime të shumta në futbollin nigerian.

Chinedu Ozor vijon të qëndrojë i shtruar dhe nën mbikëqyrjen e mjekëve. Tashmë, e gjithë vëmendja është përqendruar te gjendja e tij shëndetësore dhe përpjekjet për ta stabilizuar.