Franca shkatërron Belgjikën 4-1 dhe kalon në krye të grupit

Në ndeshjen e katërt të Ligës së Kombeve, Franca arriti një triumf bindës me rezultatin 4-1 kundër Belgjikës. Me këto tre pikë, kombëtarja franceze shkon në kuotën e 10 pikëve dhe merr vendin e parë në grup.

Ishte Belgjika ajo që e nisi më mirë ndeshjen dhe kaluan në avantazh në minutën e 35-të. Romeo Lavia dha një pasim të bukur për Dodi Lukebakio, i cili nga buza e zonës goditi fort dhe e dërgoi topin në këndin e sipërm për rezultatin 1-0.

Pas pushimit, Franca hyri në fushë me një qëndrim tjetër dhe reagoi shpejt. Në minutën e 77-të, Desire Doue shënoi një gol të bukur nga distanca, duke barazuar shifrat në 1-1 pas asistimit të Lucas Da Cunhas.

Vetëm katër minuta më pas, francezët përmbysën gjithçka. Rayan Cherki realizoi për 2-1 në minutën e 81-të, pas një veprimi të bukur të Michael Olises, i cili luajti një rol kyç në ndërtimin e këtij goli.

Më pas, Olise mori protagonistin. Në minutën e 88-të, ai pranoi një pasim nga Doue brenda zonës, u shkëput me mjeshtëri nga mbrojtësi dhe me një goditje të saktë shënoi për 3-1.

Por drama nuk mbaroi këtu. Në minutën e parë të shtesës, Olise shënoi golin e tij të dytë personal, pas një asistimi të shkëlqyer nga Desire Doue, duke e dërguar topin në këndin e poshtëm dhe duke vulosur fitoren 4-1 të Francës.

Me këtë rezultat, Franca ka grumbulluar 10 pikë pas katër ndeshjeve dhe kryeson grupin, ndërsa Belgjika mbetet pas në renditje si pasojë e kësaj humbjeje të rëndë.