Florentino Perez do të anonte nga Olise në garën me Haaland për afrimin e ardhshëm te Real Madridi

Gjatë muajve të fundit, janë shtuar zërat se Real Madridi po punon për të afruar një tjetër emër të madh, duke vijuar kështu linjën tradicionale të klubit për të sjellë “galaktikë” në “Santiago Bernabeu”.

Sipas raportimeve më të fundit, në krye të listës së dëshirave të drejtuesve të klubit madrilen ndodhen francezi Michael Olise dhe sulmuesi norvegjez Erling Haaland.

Edhe pse bëhet fjalë për dy lojtarë me karakteristika të ndryshme, të dy konsiderohen si përforcime të nivelit shumë të lartë për skuadrën e Real Madridit.

Megjithatë, mundësia që gjiganti spanjoll t’i transferojë të dy në të njëjtën kohë duket thuajse e paarritshme.

Madje, as largimi i një futbollisti të rëndësishëm nga grupi aktual nuk do të ishte i mjaftueshëm për të mbuluar shpenzimin e jashtëzakonshëm që do të kërkohej për dy prej emrave më të lakmuar në futbollin botëror.

Pikërisht për këtë temë ka folur gazetari i njohur spanjoll Tomas Roncero, i cili ka bërë të ditur se, nëse presidenti i Real Madridit, Florentino Perez, do të përballej me zgjedhjen mes këtyre dy yjeve, ai do të preferonte Michael Olisen.

“Po ta pyesësh Florentinon se kë do të transferonte tani mes Olises dhe Haalandit, ai do të të thoshte francezin, sepse ky është një profil që pëlqehet më shumë në Bernabeu”, u shpreh Roncero në emisionin El Chiringuito de Jugones.

Olise, që aktualisht është pjesë e Bayern Munichut, vlerësohet si një futbollist që i përshtatet filozofisë së Real Madridit për shkak të teknikës, krijimtarisë dhe aftësisë për të bërë diferencën në fazën sulmuese.

Në anën tjetër, Haaland vazhdon të mbetet një nga qendërsulmuesit më dominues në futbollin botëror dhe një objektiv i rëndësishëm për shumë klube të mëdha evropiane.

Sidoqoftë, largimi i tij nga Manchester City do të përbënte një operacion tepër të ndërlikuar, pasi klubi anglez nuk dëshiron të heqë dorë nga ylli norvegjez dhe do të kërkonte një shumë rekord për ta lejuar të largohej.

Në të dy skenarët, bindja e vetë lojtarit mund të mos jetë problemi kryesor.

Pengesa më e madhe do të ishte arritja e marrëveshjes me Bayern Munichun ose Manchester Cityn, dy klube që nuk synojnë të ndahen lehtë nga futbollistët e tyre kryesorë.