Flick kërkon personalisht Fabian Ruiz, Barcelona nis bisedimet për transferimin e mesfushorit të PSG-së

Barcelona ka hedhur hapat e parë drejt një transferimi të mundshëm të Fabian Ruiz, duke kontaktuar përfaqësuesit e lojtarit të Paris Saint-Germain përpara afatit veror të ardhshëm.

Mesfushori spanjoll e shikon me interes rikthimin në La Liga, teksa katalanasit tashmë kanë ndërmarrë lëvizjet fillestare për ta joshur atë drejt “Camp Nou”.

Siç njofton e përditshmja franceze Le Parisien, kërkesa për të siguruar shërbimet e Ruiz vjen drejtpërdrejt nga trajneri Hansi Flick, i cili e konsideron lojtarin një shtesë kyçe për të forcuar repartin e mesit të fushës.

Në favor të Barcelonës luan edhe kontrata aktuale e 28-vjeçarit me klubin parizien, e cila skadon në fund të qershorit të vitit 2028, duke e bërë të mundur një transferim në kushte më të favorshme.

Ruiz shihet nga stafi teknik si një opsion ideal për të alternuar me Pedrin, sidomos duke pasur parasysh largimin e mundshëm të Frenkie De Jong në merkaton dimërore dhe paqartësitë që shoqërojnë të ardhmen e Gavit te blaugranët.

I lindur në Andaluzi, Ruiz ka veshur më parë fanellat e Real Betis, Elche dhe Napolit, dhe pas eksperiencës së tij në Francë, tani synon të rikthehet në kampionatin spanjoll.

Nën drejtimin e Luis Enrique te PSG-ja, ai ka fituar dy herë Ligën e Kampionëve dhe është kthyer në një element thelbësor të formacionit parizien, duke u renditur ndër mesfushorët më me ndikim të ekipit francez.

Megjithatë, rruga për ta çuar në Barcelonë nuk do të jetë e thjeshtë. Edhe pse klubi katalanas synon ta finalizojë operacionin në verën e vitit 2027, Chelsea ka hyrë me forcë në garë për lojtarin.

Trajneri Xabi Alonso u ka bërë thirrje drejtuesve të klubit londinez, të drejtuar nga Todd Boehly, që të përshpejtojnë ofertën për të blerë mesfushorin që në merkaton e janarit, me qëllim plotësimin e boshllëkut që pritet të lërë Enzo Fernandez pas largimit të tij të mundshëm.