Flick kërkon më shumë kontroll, pavarësisht fitores 5:0 të Barcelonës ndaj Elches

Barcelona e nisi me një fitore të thellë mbrojtjen e titullit në La Liga, duke mposhtur Elchen me rezultatin 5:0 në transfertë, në javën e dytë të kampionatit.

Raphinha dhe Fermin Lopez realizuan nga dy herë secili, ndërsa Karim Adeyemi shënoi në debutimin e tij me skuadrën katalanase.

Megjithëse rezultati ishte bindës, Hansi Flick nuk e fshehu se kishte vërejtje për paraqitjen e ekipit të tij. Trajneri gjerman u ndal veçanërisht te mënyra sesi Barcelona e humbi posedimin gjatë 45 minutave të para.

“E humbëm topin shumë lehtë në pjesën e parë. Duhet të kemi më shumë kontroll”, u shpreh Flick, i cili gjithsesi e përshkroi nisjen e sezonit si “fantastik”.

Vëmendje të veçantë mori edhe mungesa e Alejandro Baldes, emri i të cilit nuk ishte përfshirë fare në listën për sfidën. Në Spanjë kanë qarkulluar raportime se Manchester United është i interesuar për mbrojtësin e majtë.

Sipas Flick, Balde ka aktualisht “shumë gjëra në mendjen e tij”, një deklaratë që lë të kuptohet se gjendja e lojtarit mund të ketë lidhje edhe me çështjen e së ardhmes së tij.

Në vendin e Baldes, nga fillimi i takimit u aktivizua 19-vjeçari Xavi Espart, i cili i la përshtypje trajnerit të Barcelonës.

“Është një tjetër lojtar nga La Masia në këtë nivel. Kjo është e jashtëzakonshme”, deklaroi Flick.

Karim Adeyemi ishte një tjetër emër që ra në sy në këtë ndeshje. Sulmuesi gjerman e festoi paraqitjen e parë me Barcelonën duke gjetur rrugën e rrjetës dhe mori vlerësime të mëdha nga tekniku i tij.

“Ai është një lojtar i jashtëzakonshëm dhe shumë i nënvlerësuar. I thashë të mos shqetësohej, sepse do ta duan këtu në Barcelonë”, tha Flick.

Trajneri nënvizoi shpejtësinë, fuqinë fizike dhe aftësinë e Adeyemit për të përfunduar aksionet, duke shtuar se gjermani po përshtatet mirë me ekipin.

Debutim të mirë pati edhe Anthony Gordon, i cili pasi u fut në lojë nga stoli, regjistroi dy asistime.

Ndryshe shkoi ndeshja për Gavin. Mesfushori 22-vjeçar u largua nga fusha pak para mbylljes së pjesës së parë për shkak të dhimbjeve në gjurin e majtë. Megjithatë, Flick nuk shfaqi shqetësim, pasi Gavi i kishte thënë se ndihej “më mirë nga sa kishte pritur”.

Barcelona do të luajë sërish më 27 gusht, kur do të presë Athletic Bilbaon në shtëpi.