FIFA mund të ndryshojë orarin e ndeshjes mes Meksikës dhe Anglisë për shkak të motit

Raportimet tregojnë se përballja e raundit të 1/16-ave të Kupës së Botës mes Meksikës dhe Anglisë mund të luhet në një orar tjetër, për shkak të kushteve të pafavorshme të motit.

Ndeshja ishte parashikuar fillimisht të niste në orën 18:00 me orën lokale në Mexico City, por tani po merret në konsideratë një ndryshim i mundshëm i saj.

Arsyeja lidhet me paralajmërimet për stuhi dhe rrufe, që sipas pritshmërive do të nisin rreth një orë para takimit dhe do të vazhdojnë gjatë një pjese të konsiderueshme të ndeshjes. Parashikimet e Met Office sugjerojnë se këto kushte të rrezikshme mund të ndikojnë drejtpërdrejt në mbarëvajtjen normale të sfidës.

Si rrjedhojë, FIFA thuhet se po shqyrton mundësinë që ndeshja të zhvillohet të dielën në ora 12:00, pra afërsisht gjashtë orë më herët sesa ishte planifikuar në fillim.

Sipas një raporti të mediumit meksikan Claro Sports, ky ndryshim po bëhet “për shkak të rrezikut nga stuhitë me rrufe”, ndërsa theksohet se bëhet fjalë për një nga ndeshjet më të shumëpritura të turneut.

Kjo nuk është hera e parë që moti ndikon në këtë Botëror, pasi edhe më parë disa sfida janë prekur nga kushtet atmosferike.

Franca, për shembull, pati një ndërprerje prej dy orësh gjatë fitores 3-0 kundër Irakut në Filadelfia, ndërsa edhe Anglia është përballur me vonesa të shkaktuara nga moti në ndeshjet përgatitore.

Meteorologu Stephen Morgan nga Fox Weather ka sqaruar se problemi kryesor nuk është shiu, por rrufetë, të cilat përbëjnë një rrezik serioz si për lojtarët, ashtu edhe për tifozët.