FIFA bllokon sërish merkaton e Tiranës, bardheblutë përballen me të njëjtin problem

Tirana është përballur përsëri me masa nga FIFA. Vetëm pak ditë përpara sfidës së radhës në kampionat kundër Elbasanit, e planifikuar të luhet të dielën në stadiumin “Selman Stërmasi”, klubi bardheblu është ndëshkuar sërish nga institucioni më i lartë i futbollit botëror.

Edhe këtë herë, masa lidhet me detyrime financiare ende të pashlyera, e njëjta arsye që shkaktoi probleme në fillim të sezonit. Si pasojë, merkatoja e Tiranës është bllokuar për herë të dytë brenda një periudhe shumë të shkurtër.

Ndryshe nga bllokimi i mëparshëm, vendimi nuk pritet të ndikojë drejtpërdrejt te skuadra gjatë kësaj faze të kampionatit. Megjithatë, drejtuesve u duhet ta zgjidhin sërish çështjen, në mënyrë që në merkaton e ardhshme të mos hasin pengesa në regjistrimin e lojtarëve sipas protokollit.