Fernando Gago përfundon në operacion urgjent pas konferencës për shtyp, klubi jep lajmin për gjendjen e tij

Fernando Gago, ish-futbollisti argjentinas dhe aktualisht trajner i Universidad de Chile, iu nënshtrua një operacioni urgjent në Santiago pas problemeve kardiovaskulare që shfaqi pas suksesit të skuadrës së tij ndaj O’Higgins. Sipas klubit, gjendja e tij është e mirë.

Në një reagim zyrtar të publikuar në rrjetin social X, Universidad de Chile sqaroi situatën shëndetësore të trajnerit të vet.

“Ne informojmë publikun se trajneri ynë Fernando Gago i është nënshtruar një sërë testesh kardiovaskulare dhe nuk do të drejtojë stërvitjen sot. Fernando është në gjendje të mirë dhe është nën mbikëqyrjen e ekipit tonë mjekësor”, thuhet në njoftim.

Problemet ai i ndjeu të enjten, pasi ekipi i tij fitoi 2-0 ndaj O’Higgins në ndeshjen që mbylli pjesën e parë të kampionatit kilian. Kampionati në Kili po vazhdon edhe gjatë Kupës së Botës, pasi kombëtarja e këtij vendi nuk arriti të kualifikohej në këtë turne.

Mediat lokale raportuan se Gago, i njohur me nofkën ‘Pintita’, u transportua në spital dhe gjatë natës iu nënshtrua ndërhyrjes kirurgjikale. Sipas portalit ADN, ai u shtrua në spital rreth orës 3 të mëngjesit.

Për shkak të kësaj situate, ai pritet të mungojë në detyrat e ardhshme me skuadrën. Gago nuk do të mund ta drejtojë Universidad de Chile në ndeshjen e parë të Kupës së Kilit ndaj Santiago Wanderers këtë të diel, ndërsa përkohësisht do të zëvendësohet nga ndihmës-trajneri Fabricio Coloccini.

Universidad de Chile është skuadra e gjashtë që Gago drejton në karrierën e tij si trajner, pas eksperiencave në klube të Meksikës dhe Argjentinës, përfshirë Boca Juniors në sezonet 2024 dhe 2025. Si futbollist, ai pati një karrierë të spikatur, duke luajtur jashtë Argjentinës për Real Madridin, Romën dhe Valencian, ndërsa me kombëtaren argjentinase regjistroi 61 paraqitje.