Europa League, Manchester United fiton derbin britanik

Manchester United fiton derbin britanik. Ekipi anglez fitoi 2-1 ndaj Rangers, përballje e vlefshme për raundin e 7-të të Europa League dhe që u transmetua në rrjetin e Radio Televizionit Shqiptar.

Një pjesë e parë e mirë e vendasve që u instaluan në portën e kundërshtarit. Në minutën e 23’ Garrnacho dha sinjalin e parë për Manchester United, por tentativa e argjentinasit u ndal nga mbrojtja e Rangers. Në këtë moment, nën harkun e një goditje nga këndi, De Ligt kaloi në avnatazh Djajtë, por goli u pa nga dhoma e sistemit VAR dhe mori konfirmimin se ky realizim nuk vlen.

Një tjetër moment për t’u përmendur ishte dhe rasti i Diallos në të 36-tën, ku sulmuesi përballë portierit nuk u tregua i saktë. Në krahun tjetër, Rangers u mjaftua me një goditje të sulmuesit Igamane që fillimisht u ndal nga Lisandro Martinez dhe më pas nga portieri Bajindir.

Edhe pjesa e dytë nisi me marsh të lartë për vendasit që kërkuan me ngulm golin e avantazhit. Tentativa e Bruno Fernandes u devijua nga mbrojtja, dhe nga goditja e këndit, pikërisht në minutën e 52’, portieri Butland shkaktoi autogol pas harkimit të Eriksen. Manchester United mund të kishte dyfishuar rezultatin në të 61-tën, me Garrnachon, por tentativa e argjentinasit përfundoi në shtyllë.

Nedim Bajrami, mesfushori i cili e nisi nga minuta e parë takimin u zëvendësua 20 minuta nga përfundimi i takimit. Rangers u përpoq të barazonte dhe ia doli. Në minutën e 88’ Dessers barazoi për Rangers. Megjithatë emocionet nuk do të përfundonin, pasi Bruno Fernandes në minutën e 93’ shënoi golin e fitores.

Fitorja e katërt radhazi në Europa League për Manchester United që me këtë sukses shkon në kuotën e 15 pikëve në vendin e katërt dhe Rangers mbetet në vendin e 13-të.