Estupinan afër Premier League, Milani planifikon të arkëtojë mbi 150 milionë euro nga shitjet

Drejtuesit e Milanit parashikojnë një merkato vere me shumë largime, duke synuar të sigurojnë rreth 150 milionë euro nga shitja e futbollistëve, me qëllim forcimin e financave dhe krijimin e fondeve për blerje të reja.

Pasi kanë zyrtarizuar ardhjen e Gonçalo Ramos dhe Mario Gilas për një total prej afërsisht 50 milionë eurosh, tani fokusi i klubit kuqezi ka kaluar te operacionet në dalje.

Bazuar në informacionet e “Gazzetta dello Sport”, Pervis Estupinan figuron ndër lojtarët që mund të ikin së shpejti. Mbrojtësi i krahut të majtë është në negociata të thelluara me Aston Villan, teksa burimet italiane bëjnë të ditur se Milani kërkon një shifër rreth 20 milionë euro për të, por do të ishte gati të mjaftohej edhe me një ofertë prej 15 milionë eurosh.

Një vlerësim i ngjashëm financiar vlen edhe për Fikayo Tomorin, i cili gjithashtu mund të jetë ndër larguesit e kësaj vere.

Nga ana tjetër, trajneri Ruben Amorim nuk po u jep hapësirë disa mesfushorëve. Milani është i hapur të shqyrtojë propozime për Youssouf Fofanan, Ruben Loftus-Cheek dhe Warren Bondon.

Emri tjetër i spikatur në listën e nxjerrë në shitje është Rafael Leao. Sulmuesi portugez është në dispozicion për rreth 60 milionë euro, megjithëse deri tani nuk ka pasur propozime zyrtare, veçanërisht nga ekipet e kampionateve më të rëndësishme të kontinentit.

Sipas raportit, qëllimi i Milanit është të grumbullojë afërsisht 150 milionë euro nga shitjet në këtë sesion transferimesh, si rrjedhojë e mungesës nga Liga e Kampionëve, por edhe për të rritur buxhetin në funksion të përforcimit të organikës.