Ema Modric nis aventurën te akademia e Real Madridit, duke ndjekur rrugën e babait të saj

Ema Modric, vajza e ikonës së futbollit kroat Luka Modric, është bërë pjesë e akademisë së femrave të Real Madridit. Ky transferim shënon fillimin e një etape të re për 13-vjeçaren, e cila po ndjek hapat e babait të saj të njohur.

Para se të mbërrinte në Madrid, Ema luante për Milanin. Në sezonin e kaluar ajo u shpall kampione në kategorinë U13, ndërsa në finalen e Garino Cup për femra, e zhvilluar në prill të këtij viti, skuadra e saj mposhti Interin e Milanos.

Ndërkohë, Luka Modric vijon karrierën në Itali pas kalimit te Milani dhe ka zgjatur qëndrimin në klub edhe për të paktën një vit. Ema, në të kundërt, ka vendosur të rikthehet në Spanjë, ku do të vijojë formimin e saj në një prej akademive më prestigjioze të futbollit në botë.

Anëtarësimi i saj te Real Madridi i shton një faqe të re lidhjes së familjes Modric me klubin spanjoll. Luka ishte pjesë e skuadrës madrilene nga viti 2012 deri në vitin 2025, periudhë gjatë së cilës u rendit mes mesfushorëve më të mëdhenj në historinë e klubit dhe të futbollit botëror.

Gjatë qëndrimit te “Los Blancos”, futbollisti kroat fitoi 28 trofe, mes tyre gjashtë tituj të Ligës së Kampionëve dhe katër tituj të La Ligës. Në 597 ndeshje me Real Madridin, ai shënoi 43 gola dhe dha 95 asistime.

Viti 2018 ishte pika më e lartë e karrierës së tij, pasi Modric fitoi “Topin e Artë” dhe u shpall lojtari më i mirë në botë.

Ndërsa Luka vazhdon rrugëtimin e tij në futbollin italian, Ema ka nisur kapitullin e saj në Real Madrid, me synimin për të ndërtuar një karrierë të suksesshme në futbollin e femrave.