Egnatia shkëlqen me “notën 10”, Dinamo triumfon me autoritet; Vllaznia bie rëndë, Elbasani ndalet te penalltitë

Skuadrat e Superiores zbritën këtë javë në fushë për ndeshjet e kthimit në Kupat e Europës, duke dhuruar rezultate që sollën edhe surpriza të mëdha.

Egnatia, kampionia e Shqipërisë, realizoi një paraqitje të shkëlqyer në kualifikueset e Champions League ndaj moldavëve të Petrocub. Në “Arena Egnatia” të Rrogozhinës, ekipi i drejtuar nga Nevil Dede shënoi 6 gola, pas barazimit 1-1 në Moldavi.

Rrogozhinasit triumfuan me rezultatin e përgjithshëm 7-2 dhe siguruan kalimin në turin e radhës. Përballja e ardhshme do t’i vendosë përballë sllovenëve të NK Celje, me synimin për të arritur një tjetër rezultat pozitiv dhe për të siguruar grupet e Conference League.

Ndër tri skuadrat e tjera shqiptare në Conference League, Dinamo dha një përgjigje të fortë në transfertën e Kazakistanit. Pavarësisht disavantazhit minimal me të cilin udhëtuan drejt Astanës, të besuarit e Ilir Dajës shënuan 4 herë ndaj vendasve, duke u shkaktuar edhe humbjen në fushën e tyre.

Dinamo vazhdon të tregojë forcë në arenën ndërkombëtare nën drejtimin e strategut shqiptar, ndërsa në raundin e ardhshëm kryeqytetasit do të luajnë kundër Aluminij të Sllovenisë.

Krejt ndryshe shkoi aventura europiane për Vllazninë. Shkodranët u eliminuan pas humbjes së thellë 5-0 ndaj Malishevës, ndonëse ndeshjen e parë në Shkodër e kishin fituar 2-1.

Skuadra e Edi Martinit nuk mundi të mbrojë avantazhin e krijuar në takimin e parë dhe gjatë 90 minutave u shfaq pa reagim, duke i dhënë fund me kokën ulur një rrugëtimi shumë të shkurtër në Europë.

Elbasani, ndërkohë, rezistoi ndaj BATE Borisov deri në çastin vendimtar të penalltive. Verdheblutë e Ivan Gvozdenovic e vunë në vështirësi kundërshtarin për kualifikimin, por fati nuk ishte në anën e tyre në “ruletën ruse”.

Karrica humbi fillimisht mundësinë e artë për të siguruar avancimin, ndërsa Epitaux më pas i dha mundësinë rivalëve bjellorusë të festonin kualifikimin.

Me dy skuadra të Superiores që tashmë e kanë mbyllur kapitullin europian, përgatitjet e tyre do të përqendrohen tërësisht te sezoni i ri i futbollit shqiptar. Nga ana tjetër, Egnatia e Nevil Dedes dhe Dinamo e Ilir Dajës vijojnë ëndrrën e tyre, pasi ambicia për të prekur grupet mbetet ende gjallë në të dy kampet.