Egnatia sfidon Midtjylland, Dede beson te mundësitë: Aleksi kërkon sa më shumë pikë

Egnatia do të zbresë nesër në mbrëmje në fushë përballë Midtjyllandit, në duelin e raundit të parë të Conference League. Takimi do të luhet në stadiumin “Air Albania” dhe do të nisë në orën 18:45. Në prag të përballjes, për mediat folën trajneri Nevil Dede dhe kapiteni i ekipit, mbrojtësi Albano Aleksi.

Albano Aleksi theksoi se skuadra është e përqendruar vetëm te sfida e radhës, duke vlerësuar nivelin e lartë të kundërshtarit. Ai nënvizoi se Midtjylland ka një përvojë të gjatë në arenën europiane, pasi ka marrë pjesë jo vetëm në Conference League, por edhe në Champions League e Europa League. Sipas kapitenit, Egnatia duhet t’i trajtojë ndeshjet njëra pas tjetrës dhe të synojë grumbullimin e sa më shumë pikëve për të vijuar më tej.

Trajneri Nevil Dede u shpreh se Egnatia duhet të ketë të qartë kapacitetin dhe cilësitë që zotëron. Ai deklaroi se diferencat mes skuadrave nuk janë të mëdha, por kërkoi që ekipi të kuptojë pozicionin ku ndodhet dhe atë që pret nga vetja. Dede shtoi se ambicia sportive e skuadrës nuk do të ndalet dhe se përgjigjen për forcën e kundërshtarëve dhe mundësitë e Egnatias do ta japë fusha.