Egnatia për historinë në Norvegji, titullarët bëjnë thirrje për mbështetje maksimale

Egnatia zbret sonte në fushë për ndeshjen e dytë të “play off”-it të Europa League, ku do të përballet me Lillestrom. Takimi do të zhvillohet në “Arasen Stadion” dhe do të nisë në orën 19:00.

Pak përpara kësaj sfide të rëndësishme, e cila lidhet me synimin e madh të rrogozhinasve për të siguruar një vend në grupet e turneut evropian, tre titullarë të ekipit u janë drejtuar tifozëve me mesazhe të veçanta. Kapiteni Albano Aleksi, Eljon Sota dhe Eneo Bitri kanë kërkuar mbështetje të fortë për Egnatian në këtë mbrëmje historike.

Albano Aleksi: “Kjo është një ditë shumë e rëndësishme për ekipin dhe për futbollin shqiptar. Ne nuk luajmë vetëm për veten, por për gjithë Shqipërinë, ndaj shpresojmë që tifozët tanë dhe mbështetësit e skuadrave të tjera të jenë sa më të shumtë në numër. Pas kaq shumë vitesh, synojmë të japim maksimumin dhe të arrijmë në grupet e Europa League.”

Eljon Sota: “I ftojmë të gjithë tifozët shqiptarë të na mbështesin, pasi kjo është një natë e madhe për ne dhe për futbollin shqiptar. Së bashku besojmë se mund të marrim një rezultat pozitiv.”

Eneo Bitri: “Ju presim në stadium për një mbështetje sa më të zjarrtë. Na jepni forcë që t’ia dalim. Forca Egnatia!”