Dyshime për doping mbi Jorginhon, mesfushorit mund t’i ndalohet futbolli për dy vjet

Jorginho, ish-përfaqësues i Italisë dhe aktualisht mesfushor i Flamengos, dyshohet se ka dalë pozitiv në një test antidoping. Nëse rezultati vërtetohet, ai mund të përballet me një pezullim të gjatë.

Raportimin e parë për rastin e bëri gazetari brazilian Thiago Asmar, i njohur si Pilhado. Sipas mediave vendase, mostra u sigurua gjatë një testimi rutinë të CONMEBOL-it, para çerekfinales së Copa Libertadores kundër Independiente.

Nuk është bërë e ditur se për cilën substancë bëhet fjalë. Kundëranaliza e mostrës B pritet të zhvillohet të martën, më 27 tetor.

Sipas Radio Globo, Flamengo deklaroi se nuk kishte marrë njoftim zyrtar për një rezultat pozitiv të mundshëm dhe nuk dinte për kundëranalizën e planifikuar. Klubi konfirmoi vetëm se CONMEBOL kishte kryer kontroll rutinë përpara çerekfinaleve.

CONMEBOL nuk pranoi të komentonte rastin, duke sqaruar se procedurat antidoping janë konfidenciale dhe se për këtë arsye nuk mund të konfirmojë apo të mohojë nëse po zhvillohet një hetim.

Nëse dyshimet konfirmohen, ndaj Jorginhos do të hapet procedurë disiplinore. Sipas raportimeve të mediave braziliane, masa mund të jetë deri në dy vjet pezullim, në varësi të substancës dhe rrethanave. Meqë në dhjetor mbush 35 vjeç, një ndalim i tillë mund të shënojë fundin e karrierës së tij.

Dyshimi u bë i ditur para ndeshjes së kthimit të gjysmëfinales kundër Estudiantes. Jorginho luajti në atë përballje pa kufizime, ndërsa Flamengo u eliminua nga Copa Libertadores.

I lindur në Brazil, Jorginho ishte ndër lojtarët kryesorë të Italisë në triumfin e saj në Kampionatin Evropian të vitit 2021. Në karrierën e tij ka luajtur për Napolin, Chelsean, me të cilin fitoi Ligën e Kampionëve, dhe Arsenalin, përpara se t’i bashkohej Flamengos në vitin 2025.