Dy gola dhe një asist në dy ndeshje, nisje perfekte për sulmuesin kroat të Tiranës: “Pero Pejiçi i ri

Tomislav Kis, i afruar gjatë merkatos së verës pa tarifë transferimi, e ka nisur në mënyrë mjaft pozitive aventurën me Tiranën. Qëndërsulmuesi 32-vjeçar kroat ka shënuar dy gola në dy ndeshje, duke dëshmuar se mund të jetë një garanci për repartin ofensiv të bardhebluve.

Përveç finalizimit, Kis ka dhënë kontribut edhe në krijimin e aksioneve për shokët e skuadrës, siç tregoi me asistin ndaj Vorës. Fiziku i tij i mundëson gjithashtu të fitojë duele dhe të avancojë ekipin drejt zonës kundërshtare.

Stili i lojës, roli në fushë dhe statistikat e vendosin Kis pranë profilit të ish-sulmuesit të Tiranës, Pero Pejiç, i cili ishte gjithashtu kroat. Gjatë sezonit të vetëm me “rekordmenët” e Shqipërisë, në vitet 2010-2011, Pejiç realizoi 15 gola në 33 ndeshje dhe ndihmoi ekipin të fitonte Kupën e Shqipërisë në vitin 2011.

Vazhdimi i sezonit do të tregojë nëse Tomislav Kis do ta ruajë këtë ritëm, por deri tani ai ka shfaqur qetësi në shfrytëzimin e rasteve dhe ka ndihmuar Tiranën të afrohet më shpesh pranë portës rivale.