Duka nuk përjashton trajner shqiptar në stolin e Kombëtares: Zgjedhje të ndryshme mund të bëhen në çdo kohë

Armand Duka nuk e sheh të mbyllur mundësinë që Kombëtarja shqiptare të drejtohet në të ardhmen nga një trajner vendas. Në një intervistë për “Klan News”, presidenti i FSHF-së tha se Shqipëria ka trajnerë të zotë si në “Abissnet Superiore”, ashtu edhe jashtë vendit.

Duka përmendi shkëmbimin e përvojave si një prej elementeve që mund t’i japë përparësi një trajneri të huaj, por theksoi se nuk ka një moment të caktuar kur duhet zgjedhur patjetër njëri apo tjetri. Sipas tij, në çdo kohë mund të merret një vendim ndryshe.

Gazetari: A mendoni se Shqipëria mund të ketë një trajner shqiptar në të ardhmen?

Armand Duka: Kemi trajnerë shumë të mirë, si ata që punojnë në “Abissnet Superiore”, ashtu edhe ata që ushtrojnë profesionin jashtë Shqipërisë, në Kosovë apo në vende të tjera. Një trajner i huaj mund të ketë disa veçori që e ndihmojnë më tepër ekipin, ndërsa edhe përvoja e shkëmbyer ka ndikimin e saj. Nuk mund të themi se tani është koha, apo se koha ka kaluar. Në çdo moment mund të bëhet një zgjedhje tjetër, qoftë për një trajner shqiptar apo të huaj.