Duel pa humbje në Superligë: Dukagjini pret Malishevën në sfidën e javës së pestë

Java e pestë e Superligës së Kosovës sjell si përballje kryesore takimin mes Dukagjinit dhe Malishevës, dy skuadra që nuk kanë njohur ende disfatë në këtë sezon të ri.

Pas katër xhirove të para, Malisheva pozicionohet në vendin e dytë të renditjes me 10 pikë të arkëtuara, teksa Dukagjini mban vendin e pestë me tetë pikë të grumbulluara.

Ky takim shihet si një provë serioze për objektivat e të dyja palëve, duke marrë parasysh formën pozitive që kanë shfaqur në startin e kampionatit. Skuadra vendase synon të përfitojë nga përkrahja e tifozëve për të siguruar fitoren dhe për t’u ngjitur më pranë liderëve.

Ndërkohë, mysafirët nga Malisheva duan të ruajnë vrullin dhe të qëndrojnë në mesin e ekipeve që luftojnë për krye të klasifikimit. Diferenca e ngushtë prej vetëm dy pikësh mes tyre e bën këtë ndeshje thelbësore për ekuilibrat në tabelë, ku një triumf do të kishte ndikim të ndjeshëm.

Trajnerët kanë bërë publike formacionet zyrtare për këtë sfidë.

Për Dukagjinin do të luajnë: Haxhihamza, Bardhoku, Sinani, Basri, Bytyqi, Hugo, Pefqeli, Salihu, Zulfiji, Stevenson dhe Isufi.

Nga krahu tjetër, Malisheva do të dalë në fushë me: Avdyli, Pira, Skovgaard, Kryeziu, Bajraktari, Vitija, Ferati, Xhylani, İsgändärli, Uka dhe Ibishi.