Drita synon vazhdimin e aventurës europiane, pret sonte Florianën në “Fadil Vokrri”

Skuadra e Dritës do të luajë sonte (e martë) në stadiumin “Fadil Vokrri” në Prishtinë ndaj Florianës, në kuadër të raundit të dytë eliminator të Ligës së Konferencës.

Takimi i parë mes dy ekipeve, i zhvilluar në Maltë, u mbyll në barazim 1-1, një rezultat që i lë garën plotësisht të hapur përballjen e kthimit. Gjilanaset u gjendën në avantazh në minutat shtesë falë një goli të realizuar nga Liridon Balaj, por gëzimi zgjati pak, meqë Floriana gjeti rrugën e rrjetës në minutën e 102-të, në një sfidë që pati zgjatje të pazakontë për shkak të një defekti në ndriçimin e stadiumit.

Pavarësisht se ekipi kosovar prodhoi disa raste të pastra shënimi gjatë 90 minutave, mungesa e finalizimit bëri që sfida të mbyllej pa fitues. Tashmë, gjithçka vendoset në Prishtinë, ku Drita shpreson të përfitojë nga terreni miqësor dhe mbështetja e zjarrtë e tifozërisë për të siguruar kalimin në turin tjetër.

Për të arritur objektivin, trajneri dhe lojtarët synojnë të përsërisin paraqitjen e mirë nga ndeshja e parë, por këtë herë me një konvertim më të lartë të rasteve të krijuara para portës kundërshtare.

Në rast se i tejkalon maltezët, Drita do të përballet me ekipin e Tre Fiorit nga San Marino në raundin e tretë kualifikues të këtij kompeticioni. Takimi i kthimit starton në orën 20:00.