Deschamps pritet të bëjë tri lëvizje në formacionin e Francës për sfidën me Irakun

Didier Deschamps besohet se po përgatit tre ndryshime në 11-shen startuese të Francës për ndeshjen e radhës në fazën e grupeve të Kupës së Botës 2026.

Pas suksesit 3-1 ndaj Senegalit në Filadelfia, ku kapiteni Kylian Mbappe realizoi dy herë, “Gjelat” e nisën me fitore rrugëtimin e tyre në grup. Sidoqoftë, edhe pse morën tre pikët, francezët u kritikuan nga mediat vendase për lojën sulmuese të treguar në pjesën e parë, e cila u vlerësua pa ritëm dhe pa mjaftueshëm krijimtari.

Në këtë kuadër, përzgjedhësi francez mund t’i japë një rast nga minuta e parë anësorit ofensiv të Paris Saint-Germain, Bradley Barcola. Nëse kjo ndodh, ai do të regjistrojë startin e parë në një Kupë Bote. Ky opsion po merret në konsideratë pasi Desire Doue nuk arriti të lërë përshtypje me paraqitjen e tij në pjesën e parë kundër Senegalit.

Sipas mediumit francez L’Equipe, stafi teknik po shqyrton nxjerrjen e Doue nga formacioni bazë dhe futjen e Barcolas, i cili pritet t’i japë më shumë gjallëri repartit ofensiv falë shpejtësisë dhe depërtimeve të tij.

Megjithatë, ndryshimet nuk mbarojnë vetëm me këtë ndërhyrje. Për t’i shtuar më shumë ide dhe krijimtari sulmit, Michael Olise mund të aktivizohet në rolin e organizatorit prapa sulmuesit, ndërsa Ousmane Dembele do të kalonte në pozicionin e tij natyral në krahun e djathtë.

Lëvizje mund të ketë edhe në prapavijë dhe në mesfushë. Lucas Digne, mbrojtësi i Aston Villas, konsiderohet kandidati kryesor për të marrë vendin e Theo Hernandez në anën e majtë të mbrojtjes. Po ashtu, mesfushori i Romës, Manu Kone, pritet të nisë ndeshjen përkrah Adrien Rabiot në qendër të fushës.

Këto plane pasqyrojnë alternativat e shumta që Deschamps ka në dispozicion, teksa synon të rrisë nivelin e paraqitjes së skuadrës dhe të vazhdojë ecurinë pozitive në Kupën e Botës 2026.