Del në shesh futbollisti që shpërfilli telefonatat e Sergen Yalçınit

Menjëherë pasi Sergen Yalçın u vendos në krye të kombëtares turke, raportohet për një zhvillim të pazakontë brenda ekipit përfaqësues.

Pas paraqitjeve zhgënjyese në Ligën e Kombeve, Federata Turke e Futbollit ndërpreu bashkëpunimin me Vincenzo Montellën dhe nënshkroi me Yalçınin, duke i besuar atij drejtimin e skuadrës kombëtare për katër vitet në vijim.

Megjithatë, menjëherë pas këtij vendimi, dolën në dritë pretendime të çuditshme. Sipas burimeve mediatike, disa lojtarë hezituan t’u kthenin përgjigje thirrjeve telefonike të trajnerit të ri, për shkak të kritikave të ashpra që Yalçın kishte shprehur më parë ndaj tyre gjatë punës si komentator televiziv.

Gazetari İbrahim Seten pohon se një nga futbollistët që fillimisht nuk pranoi komunikimin me trajnerin ishte Barış Alper Yılmaz, sulmuesi i Galatasarayt.

Sipas këtij raportimi, ndihmësi i Yalçınit u përpoq ta kontaktonte 26-vjeçarin dy herë radhazi, por thirrjet mbetën pa përgjigje.

Pas afërsisht 10 minutash pritjeje, Yılmaz më në fund iu përgjigj telefonatës dhe çështja u mbyll pa tensione të mëtejshme.

Ngjarja ka marrë vëmendje të gjerë në shtypin turk, pikërisht në momentin kur Yalçın po bëhet gati të fillojë punën me përfaqësuesen dhe të ndërtojë marrëdhënie me lojtarët që do të drejtojë.