De la Fuente zgjedh Julian Alvarezin: Do ta merrja menjëherë te Spanja

Luis de la Fuente ka bërë të ditur se, nëse do të kishte mundësinë të afronte një futbollist nga kombëtarja e Argjentinës te Spanja, zgjedhja e tij do të ishte menjëherë Julian Alvarez. Qëndrimi i përzgjedhësit spanjoll vjen disa vite pasi ai kishte surprizuar opinionin futbollistik, kur në çmimet FIFA “The Best” 2022 e kishte votuar sulmuesin përpara Lionel Messit.

Trajneri i “Furisë së Kuqe” e vlerëson prej kohësh sulmuesin nga Amerika e Jugut, i cili aktualisht është në krye të repartit ofensiv të Atletico Madridit. Sipas tij, Alvarez përfaqëson profilin që i mungon projektit të tij te kampionët e Evropës.

Në një intervistë për COPE, De la Fuente u pyet se cilin emër të madh të futbollit botëror do të donte ta natyralizonte ose ta kishte në dispozicion për kombëtaren spanjolle. Përgjigjja e tij ishte e menjëhershme dhe pa asnjë dyshim: Julian Alvarez.

Ai nënvizoi se karakteristikat e 26-vjeçarit përputhen plotësisht me mënyrën se si ai e koncepton lojën, duke lënë të kuptohet se sulmuesi do të ishte ideal për skemën aktuale të ekipit.

“Ai është një lojtar fantastik. Nuk kam gabuar kur e kam votuar në të kaluarën. Sipas idesë sime, Julian do të përshtatej në mënyrë perfekte; do të ishte një futbollist shumë i rëndësishëm”, deklaroi De la Fuente.

Pohimi i fundit i trajnerit spanjoll për sulmuesin e Atlético Madridit ka shkaktuar reagime në arenën ndërkombëtare të futbollit, edhe sepse ai nuk i ka fshehur asnjëherë bindjet e tij taktike dhe pëlqimet për profile të caktuara lojtarësh.

Nuk është hera e parë që De la Fuente shpreh publikisht admirim për ish-sulmuesin e Manchester Cityt.

Pas suksesit të Argjentinës në Kupën e Botës në Katar, vota e tij në çmimet e FIFA-s kishte ndezur debat të gjerë ndërkombëtar, pasi ai kishte lënë pas disa prej emrave më të mëdhenj të futbollit.

Megjithatë, përzgjedhësi i Spanjës ka bërë të qartë se vlerësimi i tij për cilësitë elitare të Alvarezit mbetet i pandryshuar edhe pas kalimit të viteve.