Cristiano Ronaldo mbush 40 vjeç dhe tregon planin ambicioz për të ardhmen!

Ylli i Al Nassr, Cristiano Ronaldo, i cili dje festoi ditëlindjen e 40-të, ka thënë se ëndrra e tij është të bëhet pronar i disa klubeve të futbollit. Superylli portugez nuk ka dhënë ende asnjë indikacion për pensionim dhe vazhdon të përfaqësojë vendin e tij, si dhe të luajë për Al Nassr në Ligën Pro Saudite.

Megjithatë, ai zbuloi se nuk e sheh veten në një rol trajner apo drejtori, por përkundrazi dëshiron të jetë pronar klubi. “Nuk ka shumë kuptim të jesh drejtor klubi. Nëse mund të jem pronar i klubit, pse do të isha trajner, drejtor sportiv apo drejtor ekzekutiv?”,

Ronaldo i tha televizionit portugez Canal 11. “Është ëndrra ime dhe jam i bindur që do të jem pronar i klubit. Dhe do t’ju them diçka tjetër: shpresoj që të mos kem vetëm një klub, por disa”, shtoi portugezi.

Nëse ai shkon në këtë rrugë, Ronaldo do të ndiqte gjurmët e emrit të tij të famshëm brazilian (Ronaldo Nazario), i cili zotëron shumicën e aksioneve në skuadrën spanjolle, Real Valladolid. Yje të tjerë ish dhe aktual të futbollit që zotërojnë aksione në klube futbolli përfshijnë David Beckham dhe Kylian Mbappe.

Ish-kapiteni i Anglisë është bashkëpronar i skuadrës amerikane të MLS, Inter Miami, dhe sulmuesi i Real Madridit bleu shumicën e aksioneve në klubin francez të kategorisë së dytë, Caen verën e kaluar.