CNN e sheh Adri Mehmetin si një prej shpresave të mëdha të futbollit amerikan

Talenti shqiptar i New York Red Bulls, Adri Mehmeti, është vlerësuar nga mediumi i njohur “CNN” si një prej figurave që mund të përfaqësojë të ardhmen e Kombëtares së Shteteve të Bashkuara të Amerikës.

Edhe pse është ende shumë i ri, Mehmeti ka fituar një vend të rregullt në formacionin e New York Red Bulls. Muajin e kaluar, ai bëri gjithashtu debutimin me ekipin e parë kombëtar të SHBA-së.

Mesfushori bën pjesë në brezin e ri të lojtarëve që po dalin nga Major League Soccer (MLS) dhe që pritet ta ndihmojnë futbollin amerikan të bëjë një hap të rëndësishëm përpara.

Duke folur për ngritjen e shpejtë në karrierë, Mehmeti i tha CNN Sports se nuk e kishte menduar se ngjarjet do të zhvilloheshin me një ritëm të tillë.

“Nuk e prisja që gjithçka të ndodhte kaq shpejt. Në fillim mendoja: ‘Uau, kjo është e çmendur’, sepse një vit isha te skuadra e dytë, ndërsa vitin tjetër u gjenda te ekipi i parë”.

Ai shtoi se u është mirënjohës trajnerëve dhe stafit që i besuan dhe i dhanë mundësinë të luante në këto nivele, duke theksuar se çdo ditë po përshtatet gjithnjë e më shumë me këtë realitet.

Babai, figura kryesore në rrugëtimin e tij

Mehmeti është një lojtar që nuk përputhet domosdoshmërisht me pritshmëritë që krijon mosha e tij. Pamja e tij e re nuk e tregon qartë se ai është në gjendje të luajë në një nga rolet më të vështira të futbollit, atë të mesfushorit defensiv, pozicion ku zakonisht kërkohen eksperiencë dhe pjekuri taktike.

Kur pozicionohet në mesin e fushës, 17-vjeçari duket tepër komod. Me shtatlartësi rreth 1.83 metra dhe me çorapet e ulëta, ai lëviz me qetësi, e kërkon topin edhe në hapësira të ngushta dhe shfaq siguri në përdorimin e aftësive të tij teknike.

Pas këtij progresi qëndrojnë talenti, puna e vazhdueshme dhe sakrificat e familjes. Rrugëtimi nisi që në fëmijërinë e tij, kur babai u bë mbështetja më e rëndësishme në përpjekjen për t’u bërë futbollist profesionist.

“Për mua, babai im është ndikimi më i madh, si në fushë, ashtu edhe jashtë saj”, ka deklaruar Mehmeti.

Ai ka treguar se babai e ndihmoi shumë në hapat e parë, pasi beson se nisi të luante me top me të kur ishte rreth dy vjeç. Sipas tij, lojërat e përditshme në oborrin e shtëpisë e lidhën që herët me futbollin dhe e bënë ta dashuronte këtë sport.

“Me kalimin e kohës, dashuria ime për futbollin u rrit çdo ditë. Teksa rritesha, e kuptova se kjo ishte ajo që dëshiroja të bëja dhe ëndrra që doja ta realizoja”.

Prindërit shqiptarë dhe pasioni për futbollin

Për shumë fëmijë të rritur në New York gjatë viteve 2010, futbolli nuk ishte zgjedhja kryesore sportive, pasi basketbolli dhe bejsbolli kishin më shumë ndikim. Për Mehmetin, megjithatë, loja me top ka qenë gjithmonë pjesë qendrore e jetës.

Të dy prindërit e tij kanë origjinë shqiptare, nga një vend ku futbolli ka një rol të veçantë në shoqëri. Edhe babai i Mehmetit kishte luajtur në rini dhe kishte përfaqësuar Shqipërinë në nivel të grupmoshave.

Ky pasion familjar iu transmetua edhe të riut, i cili vazhdon të jetojë me familjen e tij, ndonëse tashmë është pjesë e futbollit profesionist.

“Ende e dua futbollin çdo ditë. Ndonjëherë, edhe tani, luaj me top me babanë në oborrin e shtëpisë”.

“Shpesh e mbaj topin pranë këmbëve edhe brenda shtëpisë. Gjithmonë kam një top afër vetes dhe nuk besoj se kjo dashuri do të zhduket ndonjëherë, sepse ky është sporti që kam zgjedhur dhe për të cilin prindërit e mi kanë sakrifikuar shumë”.

“Kjo është edhe arsyeja pse e bëj për ta. Sakrificat e tyre më motivojnë çdo ditë”, ka përfunduar talenti me origjinë shqiptare.

Mehmeti e ka përfaqësuar Shqipërinë në të kaluarën, por më pas vendosi të luajë për Shtetet e Bashkuara të Amerikës. Duke qenë se ende nuk ka debutuar zyrtarisht me SHBA-në, ai teorikisht ka të drejtë ta ndryshojë vendimin dhe të rikthehet te “Kuq e Zinjtë”, ndonëse një skenar i tillë duket i vështirë.

New York Red Bulls do të luajë këtë të shtunë ndaj Inter Miamit të Lionel Messit, ndeshje në të cilën Mehmeti pritet të rikthehet në fushë. Për 17-vjeçarin kjo do të jetë një tjetër mundësi për të treguar potencialin e tij përballë një prej emrave më të mëdhenj të futbollit botëror.