Çmenduri golash në “Old Trafford”, feston Manchester United

Manchester United ishte pranë eliminimit, në disavantazh 2-4 në shtesë kundër Lionit, por gjeti forca e shënoi tre gola, duke fituar 5-4. Me fitoren, anglezët shkojnë në gjysmëfinalen e Europa League, ku do të ndeshen me Athletic Bilbao.

Një ndeshje e çmendur në Old Trafford ku Manchester United dhe Lion dhuruan nëntë gola në më tepër se dy orë lojë, në përfundim të të cilave skuadra angleze kalon në gkysmëfinalet e Europa League. United e gjeti shpejt golin e avantazhit, me anë të Ugartes, në minutën e 10-të, pas topit të marrë nga Garnacho, duke mbyllur me sukses aksionin në krahun e djathtë.

Loja vazhdon e gjallë dhe e shpejtë nga të dyja skuadrat, megjithatë golin e dytë e shënon përsëri Manchester United, në minutën e parë shtesë, me autor Dalot. Djajtë e kuq shkojnë në epërsi të dy golave në pushim, ndërkohë pesë minutë pas nisjes së pjesës së dytë Garnacho humb mundësinë e artë për të shkuar në 3-0.

Gabim që kushton shtrenjtë, pasi në minutën e 71-të Toliso barazon për Lionin, me një goditje të saktë me kokë. Francezët besojnë dhe marrin frenat e lojës e pas shtatë minutash Tagliafico gjuan, Onana grushton por përtej vijës fatale.

Si për të mos lënë asnjë dyshim, Lacazzete ndërhyn dhe tund rrjetën. Rezultati i përgjithshëm është 4-4 dhe skuadrat shkojnë në shtesë, por në epërsi numerike të anglezëve, pas Toliso mori kartonin e dytë të verdhë në minutën e 89-të . Në minutën e 105-të, Cherki gjuan saktë me të majtën dhe mposht Onanën, 3-2 për francezët që përmbysin gjithçka.

Në minutën e 108-të, Fofana fiton një penallti, të cilën e gjuan Lacazette dhe 4-2, por nuk mbaron me aq, sepse në minutën e 113-të është United që fiton penallti. Gjuan Bruno Fernandes dhe 3-4. Vendasit marrin zemër dhe në minutën e 120-të vjen goli i barazimit, 4-4.

Por nuk ka penallti, pasi vetëm një minutë më pas vjen goli i pestë për vendasit, me Maguire. Tani francezët nuk kanë më fuqi të reagojnë dhe Manchester United shkon në gjysmëfinalen kundër Athletic Bilbaos.