Çfarë fshihet pas mbishkrimit “GOLF” në fanellat e Barcelonës gjatë El Clasicos?

Në përballjen ndaj Real Madridit, Barcelona ka zbritur në fushë me fanella të veçanta, ku logoja e zakonshme e Spotify është zëvendësuar nga mbishkrimi “GOLF”.

Ky simbol nuk lidhet me sportin e golfit, por me “GOLF WANG”, markën e njohur të modës dhe veshjeve urbane të krijuar nga artisti amerikan Tyler, The Creator.

Vendosja e këtij mbishkrimi është pjesë e partneritetit që Barcelona vijon të ketë me sponsorin kryesor Spotify. Në takimet më të rëndësishme, veçanërisht gjatë El Clasicos, kompania ndryshon logon e saj duke e zëvendësuar me simbole që lidhen me emra të njohur ndërkombëtarë.

Përmes kësaj qasjeje, Spotify synon të bashkojë futbollin me muzikën dhe modën, duke përfituar nga vëmendja e jashtëzakonshme që merr dueli mes dy rivalëve historikë të futbollit spanjoll.

Tyler, The Creator bëhet kështu pjesë e listës së artistëve të famshëm që kanë vendosur logot ose simbolet e tyre në fanellat e Barcelonës gjatë ndeshjeve të mëparshme kundër Real Madridit.

Mes tyre janë Drake, Rosalia, The Rolling Stones, Karol G dhe Coldplay.

Bashkëpunimi nuk kufizohet vetëm te fanellat që lojtarët katalanas po përdorin në fushën e Spotify Camp Nou, pasi përfshin edhe një koleksion të kufizuar veshjesh të krijuar së bashku me kompaninë Nike.

Në këtë linjë gjenden veshje sportive, xhaketa dhe artikuj të tjerë të modës urbane, ku ndërthuren elementet identifikuese të Barcelonës me stilin e markës GOLF WANG.

Me këtë nismë, Barcelona dhe Spotify vijojnë të promovojnë artistë e marka të njohura përmes një prej sfidave më të ndjekura në futbollin botëror.