Çaykur Rizespor kërkon Milot Rashicën, i propozon Besiktasit huazimin e sulmuesit

Çaykur Rizespor ka ndërmarrë hapin e parë për të siguruar shërbimet e Milot Rashicës, duke i paraqitur Besiktasit një propozim zyrtar për huazimin e sulmuesit kosovar.

Mediat turke raportojnë se drejtuesit e Rizesporit e shohin 30-vjeçarin si përforcimin kryesor të repartit ofensiv dhe e kanë vendosur atë në krye të objektivave për këtë periudhë të merkatos.

Klubi tani është në pritje të përgjigjes nga Besiktasi, të cilit i takon të vendosë nëse do të japë miratimin për largimin e Rashicës në formë huazimi.

Përvoja e sulmuesit në futbollin turk, së bashku me paraqitjet e tij, kanë ndikuar që ai të jetë zgjedhja e parë e Rizesporit për rritjen e cilësisë në sulm gjatë sezonit të ri.

Drejtuesit e klubit kanë hartuar gjithashtu një alternativë, nëse bisedimet me Beşiktaşin nuk përfundojnë me marrëveshje.

Mediumi turk Takagazete bën të ditur se opsioni i parë rezervë është rikthimi i Jesurun Rak-Sakyi, i cili sezonin e kaluar ishte pjesë e Rizesporit si lojtar i huazuar nga Crystal Palace FC.

Rashica aktualisht luan për Besiktasin dhe marrëveshja e tij me klubin e Stambollit mbetet në fuqi deri në verën e vitit 2027.

Në skuadrën e Rizesporit aktivizohet edhe Qazim Laçi, mesfushori i Kombëtares së Shqipërisë.