Carragher: Real Madridi i Mourinhos nuk po bind me paraqitjet e tij

Jamie Carragher ka shprehur dyshime për ndikimin e Jose Mourinhos te Real Madridi, duke argumentuar se skuadra madrilene nuk po paraqitet në mënyrë bindëse dhe po mbështetet te golat e vonshëm dhe përmbysjet për të marrë rezultate.

Fitorja 4-3 ndaj Romës në Ligën e Kampionëve nuk mjaftoi për të bindur ish-mbrojtësin e Liverpoolit, i cili tashmë punon si analist në CBS Sports.

Sipas Carragher, skuadra spanjolle po e ka të vështirë të gjejë balancën në fushë. Ai mendon se Mourinho nuk po arrin ta zbatojë në tërësi qasjen e tij taktike në një ekip që ka kaq shumë futbollistë të rëndësishëm në repartin ofensiv.

“Për ta është shumë e vështirë, pasi kanë shumë lojtarë të mëdhenj në sulm. Kur merr drejtimin e një klubi të tillë, duhet t’i aktivizosh ata. Nuk mund të heqësh një sulmues për të futur një mesfushor më shumë”, deklaroi Carragher.

Anglezi nënvizoi gjithashtu se edhe trajnerët me një identitet të fortë taktik hasin vështirësi për ta zbatuar filozofinë e tyre në një klub si Real Madridi.

“Mourinho është një trajner që i jep rëndësi të madhe organizimit dhe strukturës së ekipit, siç e kemi parë gjatë gjithë karrierës së tij. Por edhe ai nuk mund të jetë plotësisht vetvetja te Real Madridi”, tha ai.

Carragher vlerësoi se madrilenët nuk po japin siguri me lojën e tyre, edhe pse rezultatet vazhdojnë të jenë në favorin e tyre.

“Ata nuk duken aspak bindës. Gjithsesi, po bëjnë mjaftueshëm që të mos krijohet ideja se gjithçka po shkon keq. Ende janë në garë, sepse po shpëtojnë falë golave në minutat e fundit dhe përmbysjeve”, u shpreh analisti.

Ai e konsideron El Clasicon kundër Barcelonës si një përballje që mund të përcaktojë sezonin e Real Madridit. Sipas tij, një tjetër rezultat negativ do t’ua pakësonte ndjeshëm mundësitë për të fituar titullin në La Liga.

“Diferenca e pikëve me Barcelonën është e konsiderueshme. Ata do të përballen me njëri-tjetrin këtë fundjavë dhe, nëse gjithçka shkon keq, siç mund të ndodhë, gara për titull mund të përfundojë për ta që në këtë fazë”, përfundoi Carragher.

Carragher shtoi se Mourinho duhet ta mbajë ekipin në garë për aq kohë sa të jetë e mundur dhe të synojë të fitojë të paktën një trofe, pasi Real Madridi po hyn në sezonin e tretë radhazi pa triumfuar në asnjë kompeticion.