Calabria merr dënim më të madh se Theo Hernandez dhe Dumfries pas kartonëve të kuq në derbi

Kapiteni i Milanit, Davide Calabria, është suspenduar me dy ndeshje pas një kartoni të kuq direkt në Derby della Madonnina, ndërsa Theo Hernandez dhe Denzel Dumfries do të suspendohen për vetëm një ndeshje.

Gjyqtari sportiv i Serie A dha vendimet e tij këtë pasdite (e martë), pas përfundimit të ndeshjeve të javës së 33-të.

Kapiteni i kuqezinjve, Calabria u përjashtua nga fusha në minutën e pestë shtesë në Derbit della Madonnina pasi goditi Davide Frattesin në fytyrë. Për këtë arsye, mbrojtësi i Milanit është dënuar me dy ndeshje.

Nga ana tjetër, bashkëlojtari i tij Theo Hernandez dhe mbrojtësi i djathtë i Interit, Dumfries, të cilët gjithashtu morën kartonë të kuq direkt, në minutën tretë shtesë, u pezulluan vetëm për një ndeshje.

Gjyqtari sportiv saktësoi se të dy lojtarët e kapën njëri-tjetrin për qafe, duke çuar në një të kuq të drejtë për secilin. Theo dhe Dumfries u gjobitën gjithashtu me nga 10 mijë euro secili.

Mbrojtësi i Milanit, Fikayo Tomori do të mungojë edhe në ndeshjen e radhës në Serie A kundër Juventusit, pasi ka marrë kartonin e pestë të verdhë këtë sezon.

Lojtarët e tjerë të suspenduar për javën e 34-të të Serie A janë Antonio Candreva (Salernitana), Armand Lauriente (Sassuolo), Karol Linetty (Torino), Diego Llorente, Leandro Paredes (Roma) dhe Zito Luvumbo (Cagliari). /Telegrafi/