Bruno Guimaraes pas kalimit tek Arsenali: Synoj trofe dhe dua të shkruaj histori

Pas zyrtarizimit të transferimit nga Newcastle United tek Arsenali, Bruno Guimaraes ka folur për objektivat e tij, duke u shprehur i gatshëm për një etapë të re dhe i vendosur të fitojë trofe me “Topçinjtë”.

Arsenali konfirmoi sot (e shtunë) afrimin e brazilianit për një shumë që raportohet të jetë rreth 87 milionë euro. Guimaraes ka firmosur një marrëveshje katërvjeçare, e cila përfshin mundësinë e zgjatjes edhe për një sezon tjetër.

Mesfushori e konsideron klubin londinez si destinacionin e duhur për realizimin e synimeve të tij dhe pranoi se mezi pret ta nisë këtë kapitull të ri në karrierë.

“Jam shumë i emocionuar. Kam arritur në një moment të jetës sime kur më duhet një sfidë e tillë. Synoj të fitoj trofe, dua të shkruaj histori dhe besoj se ndodhem në vendin e duhur për ta bërë këtë. Mezi pres të filloj”, deklaroi fillimisht Guimaraes.

Braziliani foli edhe për karakteristikat që pritet t’ia shtojë repartit të mesfushës së Arsenalit.

“Di ta pasoj topin, vrapoj shumë dhe luaj si një luftëtar, pa u dorëzuar asnjëherë. Do të bëj çmos për ta ndihmuar skuadrën. Ndihem mirë me topin dhe jam i qetë, shumë i qetë. Herë pas here mund të realizoj edhe gola dhe shpresoj që këtu t’i bëj të gjithë shumë, shumë të lumtur”, përfundoi braziliani.