Broja largohet nga Kombëtarja? Armando Duka tregon nëse sulmuesi është përplasur me Rejan

Armando Duka ka përgënjeshtruar një konflikt mes trajnerit të Kombëtares Edoardo Reja dhe talentit që vesh fanellën Kuq e Zi, Armando Broja.

Në një konferencë për mediat këtë të Shtunë, Presidenti i FSHF-së përgënjeshtroi raportimet se, ka pasur një konflikt mes lojtarit dhe trajnerit, apo Broja nuk do të luajnë më për Kombëtaren nën drejtimin e Rejas.

Duka shpjegoi se arsyeja e mungesës së Brojës në ndeshjet me Anglinë dhe Andorrën ishte për shkak se lojtari nuk ishte një ndjenje optimale për shkak dëmtimi.

“Broja s’ishte pjesë e ekipit në Angli se ishte i dëmtuar. Disa ditë para ndeshjes është bashkuar me ekipin, por ka bërë stërvitje individuale. Për arsye të dyshimit për gjendjen e lojtarit dhe arsye të respektit të ekipit, trajneri ka vendosur mos ta përfshijë në epik”, tha Duka, i cili shtoi se lojtari nuk mundi të rikuperojë fizikisht as për ndeshjen me Andorrën.

Duka foli me superlativa për Brojën. “Broja një super talent për ne. një djalë i shkëlqyer, është vetëm 20 vjeç. Do ta ndihmojë ekipin të paktën në 10 vitet e ardhshme”, u shpreh ai.

“Ekipi ka grumbulluar 18 pikë, si asnjëherë tjetër. Ka pasur paraqitje pozitive. Trajneri ka rinovuar ekipin dhe është premtues për të ardhmen. I gjithë ekipi, nga drejtuesit e departamentit në FSHF deri te futbollistët dhe trajneri e stafi teknik, për mendimin tim kanë bërë një punë të kënaqshme dhe e kanë arritur objektivin. Objektivi real, kur ra shorti, ishte vendi i tretë. Është luftuar për të qenë në Botëror, ishim shumë pranë. Mund ta kishim arritur objektivin, në ndeshjen ndaj Polonisë nuk kishim fat, kishim mungesa dhe nuk arritëm që të kapnim “playoff”-in e Botërorit”, tha Duka i cili shtoi se i vendos notën 8 trajnerit.

“Ne kemi filluar një projekt me trajnerin dhe stafin e ekipit kombëtar. Reja është kryetrajner për të gjitha ekipet; përgatitësi fizik është kreu i departamentit të përgatitjes fizike, që nuk e kemi pasur më parë; e njëjta gjë është me doktorin e ekipeve kombëtare dhe me video-analistin. Është një projekt i nisur që nuk mund të ndërpritet pas një viti kontratë. Kjo kontratë përfundon në 30 nëntor 2022 dhe kemi goxha kohë për të menduar për projektin e të ardhmes”, shtoi kreu i FSHF-së.