Borshi pas barazimit me Skënderbeun: Nga avantazhi 2-0 duhet të mësosh, mbrojtja ende nuk ka krijuar harmoninë

Vllaznia e nisi sezonin e ri të “Abissnet Superiore” me një barazim 2-2 ndaj Skënderbeut. Përballja e luajtur në stadiumin “Loro Boriçi” u mbyll me ndarjen e pikëve, ndërsa pas ndeshjes foli zëvendës-trajneri i skuadrës shkodrane, Ergi Borshi.

“Është normale që nga Vllaznia të kërkohet më shumë, veçanërisht nga tifozët. Kemi një skuadër të re, e cila është ende duke u formuar, pasi ka pasur largime dhe afrime. Jemi në një proces konsolidimi dhe na pret shumë punë, ndërsa tani duhet të shohim edhe ndeshjet e ardhshme. Ka shumë elementë për t’u përmirësuar dhe do t’i analizojmë me detaje së bashku me stafin.

Pas rezultatit 2-0 mund të jetë krijuar përshtypja se ndeshja ishte fituar, por ky është një moment që duhet diskutuar. Një takim nuk përfundon as në 2-0 dhe as në 3-0. Deri në vërshëllimën e fundit duhet të ruash luftën, agresivitetin dhe përqendrimin, duke fituar duelet deri sa loja të mbyllet”, u shpreh Borshi.

Ai shpjegoi edhe arsyet e zëvendësimeve të kryera gjatë takimit. “Ndryshimi i parë ishte i natyrës taktike. Skënderbeu po qëndronte në bllok të ulët dhe kërkonte të shfrytëzonte kundërsulmet me Nasr, i cili është një futbollist i shpejtë. Kjo po na krijonte probleme në atë krah. Uldedaj është lojtar i lirë dhe bëri një paraqitje të mirë, por kemi ende shumë për të punuar. Duke parë edhe eksperiencën e Mustës, vendosëm të bënim atë lëvizje.

Ndryshimi me Dumfur u bë për shkak të kartonit të verdhë, ndërsa Dulysse u spostua në atë pozicion. Lojtarët janë përzgjedhur në mënyrë që t’u përshtaten parimeve dhe ideve të trajnerit. Besoj se do ta zbatojmë stilin e lojës që kërkojmë, sepse pikërisht për këtë arsye janë afruar futbollistët e rinj të skuadrës”.

Për mënyrën se si u ndërtuan aksionet sulmuese, zv.trajneri i Vllaznisë deklaroi: “Kur kundërshtari mbrohet në një bllok të ulët, është e vështirë të gjesh hapësira në thellësi dhe të hysh në zonën e tij. Megjithatë, nëpërmjet krahëve mund të krijosh një dendësi më të madhe lojtarësh. Për Uldedajn ishte ndeshja e parë, ndërsa krosimi i vetëm erdhi nga Musta dhe portieri i Skënderbeut reagoi mirë.

Në pjesën e dytë shënuam shpejt, pasi Skënderbeu la hapësira dhe ne i shfrytëzuam siç duhet. Patëm edhe mundësinë për golin e tretë me Mehmetin, por çështja nuk qëndron vetëm te numri i golave, pasi secila skuadër ka strategjinë e vet. Detyra jonë është të arrijmë objektivin dhe mënyrën e lojës që kërkojmë”.

I pyetur për pasigurinë në qendër të mbrojtjes dhe problemet në markim, Borshi pranoi: “Po, është e vërtetë që pati konfuzion. Treshja e mbrojtjes luajti për herë të parë një ndeshje zyrtare së bashku, pasi nuk arritëm t’i aktivizonim në Evropë. Mendoj se me kalimin e ndeshjeve do të konsolidohen.

Ky repart po luan për herë të parë si treshe dhe ka aspekte që duhen korrigjuar, megjithëse në përgjithësi bënë mirë. Nevojitet punë dhe kohë, në mënyrë që mbrojtësit të fitojnë familjaritet me njëri-tjetrin. Nuk besoj se në duele apo në agresivitet ishin keq, pasi fituan shumë përballje.

Nuk duhet të harrojmë se Dumfur është ai që mbyll zonën e Celikovic dhe Pusit. Në pjesën e parë kjo u bë mirë, por pati edhe momente kur Skënderbeu na rrezikoi përmes Nasr. Jemi ende një ekip në proces konsolidimi. Koha do të ndihmojë në rregullimin e shumë gjërave dhe kam besim”, përfundoi Borshi.