Bernardo Silva: Pranova menjëherë ofertën e Real Madridit, është zgjedhja më e mirë për mua

Bernardo Silva ka treguar se nuk u mendua gjatë përpara se të pranonte ofertën e Real Madridit, klubin ku e ka parë gjithmonë një ëndërr për t’u realizuar. Mesfushori portugez beson se transferimi në Madrid është vendimi i duhur për karrierën e tij dhe familjen.

Pas ceremonisë së mirëseardhjes në “Real Madrid City”, Silva foli për Real Madrid TV dhe përshkroi emocionet që e shoqëruan në momentin e parë në klubin e ri.

“Jam jashtëzakonisht i lumtur. Kur mbërrin këtu dhe gjendesh në të njëjtën dhomë me presidentin, ndërsa të tregohen të gjitha trofetë, e kupton peshën e këtij klubi”.

“E dija se sa i madh ishte Real Madridi, por vetëm kur e përjeton nga afër e ndien vërtet madhështinë e tij. Jam shumë i lumtur që do të luaj për këtë klub”.

Futbollisti bëri të ditur se dëshira për të veshur fanellën e Real Madridit kishte nisur shumë kohë më parë, që në fëmijërinë e tij.

“Që kur isha fëmijë, në një kohë kur ende nuk e dija nëse do të bëhesha futbollist, ëndërroja të luaja për një klub të këtij niveli si Real Madridi”.

“Tani që jam këtu, mund të luaj për këtë klub, të luftoj për trofe dhe të vazhdoj traditën fituese të Real Madridit. Kjo është vërtet diçka e veçantë”.

Silva rrëfeu gjithashtu se interesi i klubit spanjoll nuk i la hapësirë për dyshime, pasi përgjigjja e tij ishte pozitive që në kontaktin e parë.

“Sapo më telefonoi Real Madridi, e dija se nuk kishte arsye të hezitoja. Kur më thanë se ishin të interesuar për mua, u përgjigja menjëherë po, pa u menduar dy herë. Besoj se ky është vendimi më i mirë për mua, për karrierën time dhe për familjen time. Të jem këtu është një ëndërr”, përfundoi ai.