Benzema zbulon presionin që e kishte nga e gjithë Franca

Karim Benzema shënoi dy gola në barazimin 2-2 të Francës kundër Portugalisë në ndeshjen finale të fazës së grupeve të Euro 2020.

Sulmuesi i Real Madridit, i cili ishte larguar nga skuadra e Francës që nga 2015, u kthye pak para fillimit të Kampionatit Evropian, ku arriti të gjejë golin në ndeshjen e pestë pas kthimit të tij, shkruan Marca.

“Kishte shumë presion rreth meje dhe e di që është normale”, tha Benzema në intervistën pas ndeshjes.

“Por unë kurrë nuk u dorëzova dhe lëviza shumë dhe kërkoja shanse. Sot më ka funksionuar. Por gjëja më e rëndësishme është që jemi në 16 të fundit”.

“Nuk kam asnjë dyshim, por mendoj se i gjithë vendi po më shikon dhe është normale pas pesë vjetësh pa qenë këtu. Unë dua ta shijoj me të gjithë”, shtoi Benzema.

Kur u pyet për presionin që ai ka ndjerë, Benzema shpjegoi se ai ndjente sytë e të gjithëve në Francë tek ai, por që në të vërtetë i ka sjellë dobi në fushë.

“Po, e kam ndjerë atë, nga i gjithë vendi, por unë jam një futbollist dhe jam një profesionist dhe gjithashtu kam nevojë për këtë presion”, përfundoi Benzema.