Belgjika fiton 2-0 ndaj Italisë

Belgjika triumfoi 2-0 përballë Italisë, duke siguruar fitoren falë golave të Mika Godts dhe Dodi Lukebakios.

“Djajtë e Kuq” e nisën takimin me ritëm të lartë dhe rrezikuan që në minutën e tetë. Charles De Ketelaere u shkëput bukur individualisht dhe goditi ulët, por Gianluigi Donnarumma ndërhyri me sukses për të shmangur golin.

Italia reagoi menjëherë, vetëm një minutë më pas. Francesco Pio Esposito mori një pasim brenda zonës dhe tentoi goditjen, por topi u përplas në shtyllën e majtë dhe u rikthye në fushën e lojës.

Belgjika gjithsesi e gjeti avantazhin në minutën e 21-të. Mika Godts zhvilloi një aksion individual, hyri në zonë dhe e dërgoi topin në këndin e poshtëm të majtë, duke e lënë Donnarumman të pafuqishëm përballë goditjes.

Skuadra belge e mbajti epërsinë deri në përfundimin e pjesës së parë. Pas pushimit, Italia u rikthye në fushë me synimin për të barazuar rezultatin.

Në minutën e 69-të, Belgjika dyfishoi avantazhin. Dodi Lukebakio kaloi disa kundërshtarë në një tjetër aksion personal dhe, nga jashtë zonës, goditi sërish në këndin e poshtëm të majtë. Donnarumma nuk mundi të reagonte dhe rezultati shkoi në 2-0.

Italia u përpoq të shënonte në minutat e mbetura, por nuk arriti të gjente golin, duke u dorëzuar përballë fitores së pastër të Belgjikës.