Bayern Munich ende pa qartësi për të ardhmen e Michael Olises

Michael Olise vazhdon të jetë një çështje e pasigurt për Bayern Munichun, pavarësisht se sezoni i ri sapo ka nisur. E ardhmja e anësorit francez pritet të diskutohet sërish gjatë verës së ardhshme, ndërsa drejtori ekzekutiv i klubit, Jan-Christian Dreesen, ka shmangur një garanci për qëndrimin e tij në “Allianz Arena”.

Francezi tërhoqi vëmendjen me paraqitjet e tij në Kupën e Botës dhe u bë objekt interesi për disa prej klubeve më të mëdha të Evropës. Megjithatë, ai nuk u largua nga Bayerni gjatë afatit të fundit kalimtar.

Klubi bavarez nuk pranoi të shqyrtonte oferta për një nga futbollistët e tij kryesorë, por drejtuesit e tij e pranojnë se rrethanat mund të ndryshojnë me kalimin e kohës.

Dreesen i ka mohuar raportimet se në zyrat e Bayern Munichut kishin mbërritur dhjetëra oferta për Olisen gjatë kësaj vere.

“Ishte absurde të thoshim se kishim dhjetëra oferta në tavolinë këtë verë. Kjo thjesht nuk ishte e vërtetë”, deklaroi ai në programin “Doppelpass”, duke iu referuar edhe interesimit të raportuar nga Real Madridi dhe klube të tjera evropiane.

Megjithatë, përgjigjja e drejtuesit bavarez për të ardhmen e lojtarit nuk ishte aq bindëse sa për të larguar shqetësimet e tifozëve.

Olise ka kontratë me Bayern Munichun deri në vitin 2029, por Dreesen theksoi se në futboll nuk është e lehtë të jepen garanci për një periudhë të gjatë. “Të bësh premtime në këtë biznes është një çështje delikate”, tha ai.

Drejtori ekzekutiv beson se situata e francezit do të rikthehet në tryezën e diskutimeve verën e ardhshme.

“Verën e ardhshme, do të diskutojmë përsëri nëse mund ta mbajmë përgjithmonë”, deklaroi Dreesen.

Meqë marrëveshja e Olises nuk përmban klauzolë lirimi, çdo lëvizje e mundshme do të varet nga negociatat e drejtpërdrejta me Bayern Munichun.

Ndërkohë, sipas “Sport1”, në klub ekziston edhe një shqetësim tjetër lidhur me futbollistin. Drejtuesit bavarezë e konsiderojnë mister qëndrimin e tij, si në daljet publike, ashtu edhe në komunikimin e brendshëm. Ata nuk e kanë të qartë nëse Olise do të kërkojë një kontratë të re apo do t’u kërkojë të negociojnë largimin e tij drejt një klubi tjetër.