Barcelona tregon afatin përfundimtar për rinovimin e plotë të ‘Camp Nou’

Joan Sentelles, i cili drejton projektin Espai Barça, ka konfirmuar se stadiumi ‘Spotify Camp Nou’ do të jetë tërësisht i përfunduar dhe në kushte optimale për të mirëpritur finalen e Ligës së Kampionëve në vitin 2029.

Drejtori i projektit ka theksuar se plani parashikon që arenës t’i shtohet kapaciteti i plotë, të vendoset çatia dhe të instalohen ekranet gjigante, në mënyrë që asgjë të mos mungojë për një ngjarje të tillë madhore.

“Do të jetë gati me kapacitet 100 për qind, çatia do të jetë montuar, ekranet do të jenë në funksion… ideja është që Limak, me punën e shkëlqyer që po kryen, ta mbyllë gjithçka shumë më herët dhe stadiumi të vihet në shfrytëzim të paktën gjatë sezonit përgatitor”, deklaroi Sentelles.

Sipas tij, Barcelona mban kontakte të rregullta me UEFA-n për të raportuar mbi fazat e ndryshme të ndërtimit dhe objektivat që synohen të arrihen.

“UEFA ka standarde të larta dhe ne u kemi sqaruar fazat e punës si dhe qëllimet tona. Duke qenë se finalja luhet në 2029-ën, ka një marzh relativisht të rehatshëm për t’u përshtatur, por synimi ynë është që gjithçka të jetë plotësisht funksionale gjatë sezonit 2028/29. Në rast se ecën mbarë, mund ta kemi edhe një periudhë të vitit 2027 me stadiumin në kapacitet të plotë”, shtoi ai.

Sentelles bëri të ditur gjithashtu se UEFA nuk ka vendosur një datë kufi të prerë për finalizimin e punimeve, megjithëse listën e kushteve për organizimin e finales e bëjnë mjaft të gjatë. Përveç stadiumit, edhe qyteti i Barcelonës duhet të plotësojë disa kritere, mes të cilave numri i hoteleve brenda një rrezeje të përcaktuar.

“Janë kërkues, por Barcelona i përgjigjet në mënyrë ideale këtyre kërkesave dhe ne do të kemi në dispozicion një stadium që respekton të gjitha standardet”, pohoi ai.

Në fund, Sentelles siguroi se pritshmëritë e UEFA-s nuk do të imponojnë modifikime plotësuese të projektit, e as kosto shtesë për klubin katalanas.