Barcelona rikthen në fokus Rafael Leaon, ndërsa vështirësohet pista për Julian Alvarez

Vështirësitë që Barcelona po has për të afruar Julian Alvarez kanë bërë që klubi katalanas të nisë vlerësimin e alternativave të tjera për repartin ofensiv.

Në këtë kuadër, një emër që është rikthyer fuqishëm në vëmendje është ai i Rafael Leao, sulmuesit portugez të Milanit, i cili prej kohësh konsiderohet si një nga objektivat e drejtuesve sportivë të “blaugranave”.

Sipas mediave italiane, më saktësisht Gazzetta dello Sport, Milani mund të pranojë një formulë huazimi me opsion blerjeje për lojtarin, në një operacion që mund të shkojë deri në 60 milionë euro.

Bëhet fjalë për një skemë të ngjashme me atë që Barcelona ka përdorur më herët në operacionin për Marcus Rashford.

Duke qenë se në këto momente Milani nuk ndodhet në një pozitë të fortë për një transferim të menjëhershëm përfundimtar, klubi italian mund të japë miratimin për largimin e Leaos në formë huazimi, me një opsion blerjeje që do të aktivizohej në fund të sezonit.

Një zgjidhje e tillë do t’i jepte Barcelonës mundësinë që ta vlerësonte nga afër lojtarin përpara se të vendosë përfundimisht nëse do të ushtrojë klauzolën e blerjes.

Po ashtu, raportohet se vetë sulmuesi portugez nuk e ka hedhur poshtë një largim nga “San Siro” gjatë verës, veçanërisht pas një sezoni që nuk ishte në nivelin e tij më të mirë, edhe pse në arenën ndërkombëtare ka pasur paraqitje pozitive.

Te Barcelona, Hansi Flick është në kërkim të përforcimeve cilësore për sulmin, ndërsa drejtori sportiv Deco po punon për të identifikuar një profil që do të rriste konkurrencën brenda skuadrës.

Ndonëse Julian Alvarez vijon të mbetet zgjedhja kryesore, qëndrimi i Atletico Madridit po e komplikon arritjen e një akordi dhe kjo po e shtyn klubin katalanas të shqyrtojë rrugë të tjera.

Në garën për Leaon nuk është vetëm Barcelona, pasi interes për sulmuesin portugez ka shfaqur edhe Manchester United.

Sidoqoftë, formula e huazimit me të drejtë blerjeje konsiderohet si një element në favor të katalanasve dhe mund të ndikojë që zhvillimet të përshpejtohen në javët e ardhshme.