Barcelona përgatit alternativën për Alvarez, Flick bind Mikautadzen për një transferim në “Camp Nou

Barcelona po shqyrton skenarë të ndryshëm për afatin kalimtar dhe, nëse dështon të mbyllë marrëveshjen për Julian Alvarez, drejtuesit katalunas kanë identifikuar Georges Mikautadzen si alternativën kryesore në sulm.

Sulmuesi gjeorgjian 25-vjeçar ka qenë prej kohësh pjesë e radarëve të Barcelonës, ndërsa profili i tij përputhet me kërkesat e trajnerit Hansi Flick për repartin ofensiv. Aftësitë teknike, lëvizjet në sulm dhe mundësia për të luajtur në disa pozita e kanë ndihmuar atë të fitojë vlerësim në futbollin evropian.

Sipas raportimeve nga Spanja, Mikautadze është afruar më shumë me klubin blaugranas pas një bisede direkte me Flickun. Trajneri thuhet se i ka prezantuar projektin sportiv të Barcelonës dhe i ka shpjeguar rolin që sulmuesi mund të ketë në skuadër.

Ky komunikim ka ndikuar që futbollisti gjeorgjian të jetë i gatshëm të shqyrtojë një kalim te Barcelona dhe të hapë derën për transferimin në “Camp Nou”.

Pavarësisht kësaj, afrimi i Alvarezit mbetet objektivi kryesor i Barcelonës. Megjithatë, operacioni për sulmuesin argjentinas shihet si shumë i ndërlikuar, ndaj klubi ka nisur të punojë më konkretisht për planin alternativ me Mikautadzen.

Marrëveshja për gjeorgjianin do të kërkonte një investim të konsiderueshëm. Barcelona vlerëson se për të hapur negociatat duhet të bëjë një ofertë prej rreth 60 deri në 65 milionë euro.

Kjo shumë është më e ulët se kostoja e mundshme e transferimit të Alvarezit, por sërish përbën një shpenzim të rëndësishëm për klubin katalunas, i cili duhet ta administrojë me kujdes situatën e tij financiare.