Barcelona përcakton shumën për Ferran Torresin, PSG-ja pret hapin e sulmuesit

Klubi katalanas ka fiksuar vlerën e kartonit të Ferran Torresit, në një moment kur Paris Saint-Germain po shfaq interesim të hapur për sulmuesin spanjoll.

Referuar raportimeve të Sport, të ripërcjella nga Goal, Barça kërkon të paktën 55 milionë euro për të lënë të lirë 26-vjeçarin.

Sipas këtyre burimeve, synimi i Barcelonës mbetet t’i propozojë lojtarit një marrëveshje të re, por pa i rritur pagën aktuale. Megjithatë, nëse vetë Torresi zgjedh të vazhdojë karrierën në kryeqytetin francez, udhëheqësit e blaugranëve nuk do të përfshihen në një luftë financiare për ta mbajtur në skuadër.

Në këto rrethana, Barcelona do të konsideronte seriozisht shitjen e tij gjatë këtij afati kalimtar.

Në kampin tjetër, Paris Saint-Germain po pret momentin e përshtatshëm për të vepruar. Kampionët e Francës mendohet se do të shtojnë përpjekjet sapo të mbyllet zyrtarisht kalimi i Randal Kolo Muanit te Juventusi.

Gjithsesi, drejtuesit parisienë nuk kanë ndërmend të depozitojnë një ofertë konkrete pa siguruar më parë një sinjal miratimi nga ana e vetë Torresit.

Ish-sulmuesi i Manchester Cityt vijon të jetë në qendër të thashethemeve në këto ditë të fundit të merkatos, ndërsa e ardhmja e tij do të sqarohet vetëm pasi të merret një vendim përfundimtar për qëndrimin ose largimin nga klubi katalanas.